Urwego rwa DASSO rwunganira Akarere mu by’Umutekano no gufatanya n’abaturage ku kubashyigikira mu bikorwa bizamura iterambere ry’imibereho myiza uko umwaka utashye.

Urwego rwa Dasso mu Karere ka Gatsibo rugizwe n’Abadasso 167 barimo abagore 35 n’abagabo 132. Abagore bagize urwego rwa Dasso mu Karere ka Gatsibo bari ku ijanisha rya 20.9% naho abagabo bari kuri 79%.

Mu mwaka w’ingengo y’imari ya 2024/2025, abagize Dasso mu Karere ka Gatsibo bifatanyije na bamwe mu baturage batari bafite amikoro ahagije, aho bishyuriye abaturage 72 ubwisungane mu kwivuza no gufatanya n’izindi nzego  gukemura ibibazo bibangamiye imibereho myiza y’abaturage.

Uretse kuba abagize urwego rwa Dasso mu Karere ka Gatsibo bakora ibikorwa bitandukanye biteza imbere umuturage, nabo ntibiyibagiwe aho bashinze ikibina cyo kuzigama no kugurizanya mu rwego rwo kwiteza imbere ubwabo n’imiryango yabo.

Kuva urwego rwa Dasso rwajyaho, ababize DASSO bo mu Karere ka Gatsibo bamaze kwizigama asaga miriyoni 41 z’amafaranga y’uRwanda aho bamaze gushora imigabane ya miriyoni zisaga 28 mu kigega cya RNIT, asigaye abanyamuryango bakayiguriza.

Umuyobozi wa Dasso mu Karere ka Gatsibo, Rugiranka Rigati Gaspard ahamya ko abagize urwego rwa Dasso mu Karere ka Gatsibo bamaze kwiteza imbere binyuze mu muco wo kwishyira hamwe no kwizigama. Ati: ‘’ Kugeza ubu twashoye imigabane yacu mu kigega cya Leta kandi cyitwungukira, kandi nta mugenzi wacu ugira icyo acyenera ngo akibure kuko aba afite aho yashoye umutungo we’’.