Urubyiruko rwasoje amasomo mu kigo cy’igororamuco cya Iwawa rurasabwa kwibumbira hamwe no kugana ibigo by’imari (Saccos)kugirango bafashwe kubona inguzanyo zabafasha gukora imishinga ibateza imbere

Kuri uyu wa kane taliki ya 6 Gashyantare 2020 hakozwe inama nyunguranabitekerezo yahuje Ubuyobozi bw'Akarere ka Gatsibo n'ikigo cy'Igihugu gishinzwe igororamuco(NRS) igamije kungurana ibitekerezo ku gusubiza ubuzima busanzwe urubyiruko rwarangije amasomo mu kigo cy'igororamuco cya Iwawa.

Iyi nama yari iyobowe n'Umuyobozi w'Akarere ka Gatsibo wungirije ushinzwe imibereho myiza y'abaturage   Kantengwa Mary arikumwe na Commissioner Gumira, Umuyobozi Mukuru wungirije w'Ikigo cy'igihugu gishinzwe igororamuco (NRS).

Muri iyi nama haganiriwe uburyo bwo gufasha urubyiruko rwasoje amasomo y'igororamuco kubona inguzanyo irimo n'inkunga kubufatanye n’ikigo cy’igororamuco(NRS),BDF n’ibigo my’imari biciriritse bya Sacco.

Mu rwego rwo kurushaho gufasha urubyiruko  kubona ibikoresho n’inguzanyo mu bigo biciriritse,abari mu nama basabye urubyiruko guhuriza  hamwe imbaraga bibumbira mu ma koperative.

Komiseri Gilbert Gumira,Umuyobozi Mukuru wungirije w’Ikigo cy’Igihugu gishinzwe igororamuco mu Rwanda yasabye urubyiruko gukora imishinga ibateza imbere kuko Leta ibishingira 50% y’inguzanyo bahabwa nabo bakagira uruhare rwa 50% mu kwishyura inguzanyo.

Kubufatanye n’inzego zitandukanye zifite aho zihuriye n’urubyiruko,Kantengwa Mary Umuyobozi w’Akarere ka Gatsibo wungirije ushinzwe imibereho myiza y’abaturage yavuze ko Akarere ka Gatsibo kazakomeza guteza imbere ibikorwa by’urubyiruko bafashwa gukora imishinga myiza ibabyarira inyungu no kubafasha kubona inguzanyo mu bigo by’imari biciriritse.