Kuri uyu wa Gatanu taliki ya 6 Gicurasi 2022,mu cyumba cy'Inama cya East Gate Hotel iherereye mu murenge wa Kabarore mu Karere ka Gatsibo habereye inama yahuje Ubuyobozi bw'Akarere  n'Umuryango utabara imbabare(Rwanda Red Cross) yari igamije gutangiza umushinga ku mugaragaro uzakorera mu Nkambi ya Nyabiheke no mu baturage bazakiriye(Host Community)

Iyi nama yitabiriwe n'Umuyobozi w'Akarere wungirije ushinzwe iterambere ry'Ubukungu  Sekanyange Jean Leonard, Umunyamabanga Nshingwabikorwa w'Umurenge wa Gatsibo n'abafatanyabikorwa bakorera mu Nkambi ya Nyabiheke iherereye mu Murenge wa Gatsibo

Umushinga wa "Humanitarian Protection Phase 1" uzamara imyaka ibiri ukorera mu Nkambi ya Nyabiheke iri mu Karere ka Gatsibo),Mahama muri Kirehe na Kiziba iherereye mu Karere ka Karongi.Uyu mushinga ufite ingengo y'imari ingana na Miriyari 1,737,794,183 z'amafaranga y'uRwanda.

Sekanyange Jean Leonard,Umuyobozi w’Akarere ka Gatsibo yashimye uruhare rw’abafatanyabikorwa mu iterambere n’imibereho myiza y’abaturage n’impunzi z’abanyekongo ziri  mu nkambi ya Nyabiheke

Ubuyobozi bw’umuryango utabara imbabare mu Rwanda(Red cross) bwavuze ko binyuze muri uyu mushinga hazarwanywa Ibiza mu nkambi no hanze yayo,impunzi n’abaturage bazakiriye bazigishwa ibikorwa by’isuku n’isukura,hazasanwa amazu 50 mu nkambi ya Nyabiheke,hazatangwa ibiryamirwa(matress) 250 ku mpunzi zo mu nkambi ya Nyabiheke hanubakwe ubwiherero bw’abaturage batishoboye bakiriye impunzi.