Mu rwego rwo gushima ibikorwa bitandukanye abacitse ku icumu rya Jenoside yakorewe abatutsi bakora mu bihe bitandukanye birimo no guhumurizanya ibihe bikomeye banyuzemo mu gihe cya Jenoside yakorewe abatutsi,

Prezida wa ibuka mu Karere ka Gatsibo Sibomana Jean Nepo yavuze ko kubera ibikorwa bitandukanye uwacitse ku icumu Mukamutara Dorothee akora asukura urwibutso rwa Jenoside yakorewe abatutsi umuryango ibuka uzamwubakira inzu mu minsi 100 yo kwibuka

Abarokotse Jenoside yakorewe abatutsi mu Karere ka Gatsibo umurenge wa Remera bashimiye mu ruhame Ibambasi fidel wayoboraga segiteri  Remera mu gihe cya Jenoside yakorewe abatutsi washoboye kurokora abatutsi, bamugeneye inka y’ishimwe,igisabo n’icyatsi

Padiri Mario wayoboraga paruwasi ya muhura mu gihe cya Jenoside yakorewe abatutsi nawe yagenewe inka y’ishimwe n’abacitse ku icumu rya Jenoside yakorewe abatutsi ku ruhare yagize rwo kurokora abatutsi benshi bari bahungiye kuri kiriziya gaturika ya muhura

Mu rwego rwo gushimira uruhare rukomeye ingabo zari iza RPA Inkotanyi zagize ibikorwa by’ubutwari zikabohora Igihugu zikanarokora abatutsi benshi bahigwaga mu gihe cya Jenoside yakorewe abatutsi,abacitse ku icumu bageneye prezida wa Repubulika Paul Kagame impano nk’uwari uyoboye urugamba

Mu ijambo Padiri Mario yagejeje ku bari mu muhango wo kwibuka ku nshuro ya 25 hibukwa Jenoside yakorewe abatutsi mu Rwanda,yavuze ko ashima leta y’u Rwanda ihora hafi abarokotse Jenoside,avuga ko muri ibi bihe yari padiri mukuru wa paruwasi ya muhura ariko banyuze mu bihe bikomeye we n’intama(abakristo) zari zamuhunyiyeho

Uyu mupadiri w’umutariyani umaze imyaka 29 mu Rwanda,yavuze ko Igihugu cye gifatanyije n’ingabo za Minuar cyohereje ndege kugirango asubire iwabo kubera ibihe bibi byari mu Rwanda icyo gihe ariko aranga kuko atari gusiga abatutsi bari bahungiye kuri kiriziya yayoboraga.

Mu butumwa bwatanzwe n’Umuyobozi w’Akarere ka Gatsibo Gasana Richard yashimye uburyo abaturage b’Akarere bitabiriye gahunda yo kwibuka nta n’ibibazo by’ingengabitekerezo ya Jenoside yigeze igaragara kuva taliki 7-13 Mata 2019,yasabye abaturage kugira ubutwari bwo gukora ibikorwa by’indashyikirwa nk’ababikoze bakarokora abatutsi bahigwaga