Bamwe mu badepite mu nteko ishingamategeko y’u Rwanda bari muri komisiyo y’ingengo y’imari n’umutungo by’Igihugu basuye Akarere ka Gatsibo baganira n’inzego zitandukanye zikorera mu karere.

Uruzinduko rw’intumwa za rubanda mu karere ka Gatsibo rwari rugamije kurebera hamwe uko ingengo y’imari y’umwaka 2017/2018 ikoreshwa  ku bikorwa bitandukanye Akarere kiyemeje kugeza ku baturage.

Abadepite basuye Akarere ka Gatsibo barimo Depite Mukayuhi Constance, Prezidante wa komisiyo y’ingengo y’imari n’umutungo by’Igihugu mu nteko ishingamategeko y’u Rwanda, Depite Mutesi Anitha na Mporanyi Theobald.

Mu mbogamizi zagaragarijwe intumwa za rubanda zirimo imisoro ikomoka ku butaka idakusanwa uko bikwiye kubera abaturage bamwe bafite ubutaka budashoboye gusorerwa aho usanga umuturage afite hegitari 5 zikitwa aho gutura.

Umuyobozi w’Akarere ka Gatsibo wungirije ushinzwe iterambere ry’ubukungu Manzi Theogene yasabye intumwa za rubanda gukorera ubuvugizi iki kibazo cyugarije abaturage.

Madamu Prezidante wa komisiyo y’imari mu nteko ishingamategeko yashimye uburyo ingengo y’imari irimo gukoreshwa mu karere ka Gatsibo, asaba ko ikibazo kibonetse cyajya gikorerwa ubuvugizi mu nzego zirebwa n’icyo kibazo.

Akarere ka Gatsibo gafite ingengo y’imari y’umwaka wa 2017/2018 ingana ya miliyari 15,501,641,055 y’amafarnga y’u Rwanda.