Inzego zitandukanye zaganiriye ku iterambere rirambye ry’Akarere n’ishyirwa mu bikorwa ry’imihigo 2021/2022.

Mu karere ka Gatsibo hakozwe inama nyunguranabitekerezo ku iterambere ry’Akarere yahuje inzego zitandukanye zirimo abagize Inama Njyanama y’Akarere n’imirenge,abafatanyabikorwa b’Akarere,Abanyamabanga Nshingwabikorwa b’Imirenge n’abayobozi b’amashami ku rwego rw’Akarere.

Iyi nama yafunguwe ku mugararagaro na Perezida w’Inama Njyanama y’Akarere ka Gatsibo Sibomana Saidi, kuri uyu wa Kabiri taliki ya 25 Mutarama 2022 igamije kurebera hamwe ishyirwa mu bikorwa rya gahunda y’iterambere rirambye ry’Akarere (DDS) n’Imihigo y’Akarere mu ngengo y’imari ya 2021/2022.

Gahunda y’iterambere rirambye y’Akarere ka Gatsibo igizwe n’imirongo migari 255 irimo 130 yamaze gushyirwa mu bikorwa 100%,imirongo migari 13 yashyizwe mu bikorwa ku kigereranyo kiri hagati ya 90-99.9% naho imirongo migari 49 imaze gukorwa ku kigereranyo cya 50-89.9%.

Mu mwaka w’ingengo y’imari ya 2021/2022, Akarere ka Gatsibo kahise imihigo 99 irimo 29 yo mu bukungu, 54 mu mibereho myiza na 16 yo mu miyoborere myiza n’ubutabera.

Umuyobozi w’Akarere ka Gatsibo Gasana Richard yavuze ko hagiye gukorwa ibikorwa bitandukanye birimo guhanga udushya turimo guhugura abahinzi b’urutoki nibura 5 muri buri Kagari,guhemba abakozi bahize abandi mu gutanga serivise ,kwesa imihigo mbere y’igihe cyagennwe no gutanga serivise hifashishijwe ikoranabuhanga bizakemura ikibazo cyo gusiragira mu buyobozi bashaka serivise.

Sibomana Saidi, Perezida w’Inama Njyanama y’Akarere ka Gatsibo yasezeranyije abanyamabanga Nshingwabikorwa b’Imirenge ko uzasoza kubaka amazu y’abaturage batishoboye mu gihe cy’amezi 2 gusa ari imbere azamugabira inka nk’ishimwe.

Asoza iyi nama nyunguranabitekerezo ku iterambere ry’Akarere ka Gatsibo,Guverineri w’Intara y’Iburasirazuba CG Emmanuel K Gasana yasabye inzego z’ubuyobozi zitandukanye gukora akazi kabo bashyira umuturage ku isonga hagamijwe iterambere n’imibereho myiza y’abaturage.