Abafatanyabikorwa b’Akarere ka Gatsibo bagera kuri 70 bishimiye ubufatanye bwiza bagiranye n’Akarere mu mwaka w’ingengo y’imari 2016/2017 ndetse bishimira n’umusaruro mwiza wabonetse mu kwesa imihigo.

Ibi byagarutsweho n’abafatanyabikorwa b’Akarere kuri uyu wa kane taliki ya 19 Ukwakira 2017 ubwo bahuriraga mu nteko rusange y’abafatanyabikorwa n’Akarere ka Gatsibo.

Ntaganda Robert,Prezida wa JADF yashimiye uruhare rwaburi mufatanyabikorwa yagize mu mihigo y’umwaka 2016/2017 asaba ko uyu mwaka w’ingengo y’imari buri wese yakongera imbaraga imibereho myiza y’abaturage ikarushaho kumera neza.

Ubwo yatangizaga inteko rusange y’abafatanyabikowa,Manzi Theogene Umuyobozi w’Akarere ka Gatsibo yagarutse ku kamaro k’abafatanyabikorwa b’Akarere mu iterambere ry’abaturge,avuga ko abafatanyabikorwa bibumbiye mu nkingi 3 arizo ubukungu,imibereho myiza y’abaturage,imiyoborere myiza n’ubutabera bose bakoze neza mu mwaka w’ingengo y’imari 2016/2017.

Akarere ka Gatsibo kasinyanye imihigo 66 na Prezida wa Repubulika mu mwaka w’ingengo y’imari 2017/2018 irimo 37 y’ubukungu,17 imibereho myiza na 12 mu miyoborere myiza n’ubutabera.