Kuri uyu wa kane taliki ya 4 ukwakira 2018,Inama isanzwe y’Inama Njyanama yateranye iyobowe na Rukemanganizi Cyprien Prezida w’Inama Njyanama y’Akarere ka Gatsibo.

Iyi nama yari igamije kwiga ku ngingo zitandukanye zirimo kugezwaho ibibazo abajyanama batumwe n’abaturage bahagarariye mu mirenge, kwemeza ikibanza kizubakwaho ishuri ry’imyuga  n’ibindi.

Mu rwego rwo gukomeza kwegereza abaturage ibikorwaremezo mu karere ka Gatsibo,Inama Njyanama yemeje ko hatangwa ikibaza cya hegitari 5 z’ubutaka zizubakwaho ishuri ry’imyuga mu Murenge wa Kabarore Akagari ka Karenge.

Iyi nyubako izubakwa n’Akarere ka Gatsibo kubufatanye n’Ikigo cy’Igihugu gishinzwe guteza imbere imyuga n’ubumenyangiro (WDA) izatwara akayabo ka miliyari 7 z’amafaranga y’u Rwanda.

Biteganyijwe ko mu mwaka w’ingengo y’imari 2018/2019, ishuri ry’imyuga n’ubumenyangiro rizubakwa mu murenge wa Kabarore rizaba rigeze ku kigereranyo cy’10%.

Abagize komisiyo y’Ubukungu, imibereho myiza n’imiyoborere myiza mu nama Njyanama bagejeje bimwe mu bifuzo byafatwa nk’imyanzuro ikemezwa n’Inama Njyanama birimo gukomeza gushyira imbaraga zo gukemura ibibazo bibangamiye imibereho myiza y’abaturage birimo abana bagita ishuri.

Mu rwego rw’ubukungu, Inama Njyanama yemeje ko agakiriro kubatswe mu murenge wa kabarore katangira gukora,mu rwego rw’igerageza abakoreramo bagasonerwa umusoro mu gihe cya mezi atatu n’amezi 12 y’ubukode mu rwego rwo kwimenyereza akazi.