Mu cyumweru cyahariwe kwimakaza ihame ry’uburinganire  mu Karere ka Gatsibo cyateguwe kubufatanye n’Intara y’Iburasirazuba n’Urwego rw’Igihugu rushinzwe iyubahirizwa ry’ihame ry’uburinganire(GMO) n’abafatanyabikorwa batandukanye bakorera mu Karere.

Iki cyumweru cyari gifite insanganyamatsiko igira iti ‘’Ihame ry’Uburinganire,imbarutso y’imiyoborere myiza n’iterambere rirambye’’.

Taliki ya 19 Nzeri 2022,nibwo hatangizwaga icyumweru cyahariwe kwimakaza ihame ry’uburinganire cyatangirijwe mu Murenge wa Rugarama aho cyitabiriwe n’ Umunyamabanga Uhoraho muri Minisiteri y'Ubutegetsi bw'Igihugu,intumwa za rubanda n'abafatanyabikorwa batandukanye bafatanya n'Akarere ka Gatsibo kwimakaza ihame ry’uburinganire n’iterambere rirambye ry’Akarere.

Mu cyumweru cyahariwe kwimakaza ihame ry’uburinganire n’ubwuzuzanye hasezeranye imiryango 515 yabanaga mu buryo butubahirije amategeko biyemeza gusezerana imbere y’amategeko.

Mu rwego rwo guha umwana uburenganzira mu muryango,mu cyumweru cyahariwe kwimakaza ihame ry’uburinganire,handitswe abana mu bitabo by’irangamimerere bagera kuri 1,198 barimo 537 b’abahungu n’abakobwa 661.

Gasana Richard,Umuyobozi w’Akarere ka Gatsibo yavuze ko iki cyumweru cyo kwimakaza ihame ry’uburinganire cyasize umusaruro ukomeye mu Karere aho imiryango igera kuri 515 yasezeranye imbere n’amategeko handikwa abana mu bitabo by’irangamimerere bagera 1,198.

Muri ubu bukangurambaga, imiryango igera kuri 93 yasezeranye ku ikubitiro yaremewe ibikoresho by’isuku birimo ibiryamirwa n’ibikoresho by’ishuri ku bana babo byatanzwe kubufatanye n’umushinga wa Compassion International.

Mu bikorwa byo kwimakaza ihame ry’uburinganire,hatanzwe amagare 4 ku bantu bafite ubumuga mu rwego rwo kuborohereza ingendo bakora bajya mu bikorwa bitandukanye byo kwiteza imbere n’imiryango yabo ndetse hatanzwe imashini 5 ku baturage batishoboye bize ubudozi.

Umunyamabanga uhoraho muri Minisiteri y’Ubutegetsi bw’Igihugu Samuel Dusengiyumva yasabye imiryango yashyingiranwe imbere y’amategeko kubaka umuryango uzira amakimbirane ahubwo bakiyubaka bahereye kuri bicye bafite.