Inzego z’urubyiruko zo mu mirenge 14 igize Akarere ka Gatsibo ziyemeje gukomeza gukurikirana no gutanga amakuru kuri bimwe mu bibazo bibangamiye imibereho myiza y’abaturage birimo abana bata ishuri, imiryango itagira ubwiherero n’ikibazo cy’abana b’abakobwa baterwa inda zidateganyijwe.

Ibi babigarutseho kuri uyu wa gatatu taliki ya 9 Gashyantare 2022 mu nama y’umunsi umwe yahurije hamwe inzego z’urubyiruko zirimo abagize inama y’Igihugu y’urubyiruko, urubyiruko rw’abakorerabushake n’urubyiruko rushamikiye ku rugaga ry’Umuryango FPR Inkotanyi.

Muri iyi nama, urubyiruko rwagarutse kuri imwe mu mihigo igomba kwitabwaho mu rwego rwo kuzamura iterambere n’imibereho myiza y’abaturage irimo gukangurira urubyiruko kwihangira imirimo binyuze mu kwiga imyuga kugirango bafashwe kubona ibikoresho birimo ni ibyabafasha gukora imirimo y’ubukorikori mu gakiriro.

Umuhuzabikorwa w’Inama y’Igihugu y’urubyiruko mu Karere ka Gatsibo Mugabo Egide yavuze ko inama y’urubyiruko yateranye yari igamije kurebera hamwe  ishyirwa mu bikorwa ry’imihigo y’urubyiruko ya 2021/2022 igeze ishyirwa mu bikorwa,ati’’twiyemeje gukorera hamwe n’urundi rubyiruko tugamize kuzamura iterambere n’imibereho myiza y’abaturage’’.

Bagirishya Vedaste ni umwe mu bitabiriye inama yahuje inzego z’urubyiruko akaba no muri komite nyobozi y’Inama y’Igihugu y’urubyiruko mu Karere ka Gatsibo yavuze ko muri uyu mwaka w’ingengo y’imari ya 2021/2022 bahize imihigo 30 irimo 11 yo mu bukungu,6 mu mibereho myiza na 13 yo mu miyoborere myiza.

Iyi mihigo y’urubyiruko uko ari 30 yahizwe muri 2021/2022 imaze kweswa ku kigereranyo ya 65% mu gihe cy’ibihembwe bibiri by’umwaka kuva muri Nyakanga kugeza mu kuboza 2021.

Kobusinge Jane umwe mu rubyiruko rushamikiye ku muryango FPR Inkotanyi rwitabiriye inama ku mihigo yavuze ko bimwe mu bibazo biri mu rubyiruko birimo guterwa inda zidateganyijwe biterwa no kutagira akazi kabahuza bagahitamo kwishora mu ngeso mbi, ati ’’Turakangurira urubyiruko kugira umuco wo kwizigama binyuze mu bibina kugirango ejo habo hazabe heza’’.

Yavuze ko abana b’abakobwa bagomba kwitinyuka bakirinda ibibashuka ahubwo bakibumbira mu matsinda y’urubyiruko bazigama amafaranga macye muhoro buhoro bakagera ku cyo bifuza bakiteza imbere,ati ’’Ngewe natangiye nizigamira amafaranga 500 mu cyumweru muri 2019 none ubu ngeze ku bushobozi bwo kwizigamira ibihumbi 32,800Frw mu kwezi,murumva ko ngeze kure ntawanshukisha ikintu runaka kuko mbashije kukigurira’’.