Nyuma yuko imihigo y’umwaka w’ingengo y’imari wa 2017/2018 isuzumwe n’Urwego rw’Igihugu, Ubuyobozi bw’Akarere, abakozi bafite imihigo n’Abanyamabanga Nshingwabikorwa b’Imirenge bahuriye hamwe hagamijwe kunoza imihigo y’Akarere ya 2018/2019 Igikorwa cyo guhuza igengo y’imari,imihigo n’iteganyabikorwa cyatangiye kuri uyu wa mbere taliki ya 16 Nyakanga 2018 kikazasozwa taliki ya 17 Nyakanga 2018.  Imihigo y’Akarere ka Gatsibo y’umwaka w’ingengo y’imari ya 2018/2019 yahujwe n’iteganyabikorwa (Action Plan) ndetse na gahunda y’amasoko ya leta(Procurement Plan) hagamijwe kuzayesa neza. Umuyobozi w’Akarere ka Gatsibo Gasana Richard yashimiye inzego zitandukanye z’Akarere zagize uruhare rukomeye mu migendekere myiza y’imihigo 2017/2018 asaba abakozi b’Akarere,abafatanyabikorwa b’Akarere/JADF guhanga amaso imihigo y’umwaka 2018/2019. Mugiraneza David, Umuyobozi w’igenamigambi mu Karere ka Gatsibo yavuze ko guhuza iteganyabikorwa, gahunda y’umwaka y’itangwa ry’amasoko ya leta n’ingengo y’imari bizafasha kwesa imihigo neza kandi ku gihe cyagenwe. Mu mwaka w’ingengo y’imari wa 2018/2019,Akarere ka Gatsibo gafite imihigo 57 irimo 24 y’ubukungu,21 y’imibereho myiza na 12 y’imiyoborere myiza n’ubutabera.