Mu karere ka Gatsibo harimo gushakwa umuti urambye wo gukemura burundu ikibazo cy’imirire mibi ikigaragara mu bana bari munsi y’imyaka itanu.

Kuri uyu wa kabiri taliki ya 3 Mata 2018 hateranye inama y’Ubuyobozi bw’Akarere ihuriwemo n’inzego zitandukanye zikorera mu karere hashakwa igisubizo cy’ikibazo cy’imirire mibi ibangamira ubuzima bw’abana.

Umuyobozi w’Akarere ka Gatsibo Gasana Richard yasabye inzego zitandukanye zirimo n’izu buvuzi ko ikibazo cy’imirire mibi ikigaragara mu bana cyarangizwa kugirango bakure bafite ubuzima bwiza.

Nyuma y’ibiganiro bitandukanye, hemejwe ko bitarenze taliki ya 20 Mata 2018 abana bari mw’ibara ry’umuhondo(yellow) baba bavuye ku bigo nderabuzima bagakurikiranwa n’ibitaro bibiri by’Akarere ka Gatsibo birimo kiziguro na Ngarama.

Muri iyi nama hagaragajwe ko ikibazo cy’umwanda ari kimwe mu bibazo bitera imirire mibi ikigaragara mu miryango imwe n’imwe, hasabwa ko ikibazo cy’umwanda kiza ku isonga mu gukemuka.

Kimwe mu bisubizo by’ikibazo cy’imirire mibi,hanzuwe ko igikoni cy’umudugudu cyongerwa imbaraga kugirango abana b’uwo mudugudu bajye bafata indyo yuzuye.

Iyi nama yitabiriwe n’Ubuyobozi bw’Akarere,inzego z’umutekano,abayobozi bakuru b’ibitaro bya Ngarama na Kiziguro,abashinzwe ubuzima ku rwego rw’imirenge no kubigo nderabuzima,abashinzwe imirire ku bitaro n’ibigo nderabuzima.