Ibikorwa by’urugerero rw’inkomezamihigo z’Akarere ka Gatsibo byunganira ingengo y’imari y’Akarere buri mwaka kuko urubyiruko rusoje amashuri yisumbuye ruhurizwa hamwe mu tugari rukomokamo bagakora urugerero.

Ni muri urwo rwego, kuri uyu wa mbere taliki ya 14 Ugushyingo 2022 mu Karere ka Gatsibo kimwe no mu tundi turere hatangijwe urugerero rudaciye ingando rw’inkomezabigwi icyiciro cya 10 rufite insanganyamatsiko igira iti ‘’ Duhamye umuco w’ubutore ku rugerero twimakaza ubumwe n’ubudaheranwa’’.

Ku rwego rw’Akarere ka Gatsibo, urugerero rudaciye ingando rwatangirijwe mu kagari ka Mugera mu murenge wa Gatsibo aho ubuyobozi bw’Akarere, abaturage biganjemo urubyiruko n’inzego z’umutekano basije ikibanza kizubakwamo ibiro by’akagari ka Mugera.

Kuri uyu munsi w’itangira ry’urugerero rudaciye ingando, abatozwa basinyanye imihigo n’Ubuyobozi bw’Umurenge n’utugari ku bikorwa bateganya gukora mu gihe cy’amezi atatu urugero ruzamara.

Ibikorwa biteganyijwe gukorwa ni ibizana ibisubizo by’ibibazo abaturage bahura nabyo birimo kubaka no gusana amazu y’abatishoboye,kubaka ubwiherero,uturima tw’igikoni,gusubiza abana mu ishuri n’ibindi.

Umuyobozi w’Akarere ka Gatsibo wungirije ushinzwe imibereho myiza y’abaturage Mukamana Maceline yavuze ko biteze umusaruro mwiza ku rugerero rudaciye ingando bazakora mu gihe cy’amezi 3,ni ukuva taliki ya 14/11/2022 kugeza 28/2/2023.

Akarere ka Gatsibo gafite abatozwa 979 barimo abahungu 503 n’abakobwa 476 batorezwa mu byanya by’ubutore 69.