Mu Karere ka Gatsibo hasinywe imihigo yo kurengera umwana no kurwanya ubukene mu baturage mu rwego rwo gukomeza gushakira abaturage iterambere n’imibereho myiza.

Iki gikorwa cyakozwe kuri uyu wa Kabiri taliki ya 1 Gashyantare 2022 ubwo hizihizwaga umunsi mukuru w’Intwari z’Igihugu wari ufite insanganyamatsiko igira iti ’’Ubutwari mu banyarwanda, agaciro kacu ’’ wahuriranye n’inama mpuzabikorwa y’Akarere.

Umunyamabanga wa Leta muri Minisiteri y’ubutegetsi bw’Igihugu Madamu Ingabire Assumpta wari n’umushyitsi mukuru yashimiye intwari z’uRwanda zakoze ibikorwa by’indashyikirwa bigamije guhangana n’ibibazo byari byugarije uRwanda bikagera naho batakaza ubuzima bwabo.

Zimwe mu ntwari zagarutsweho uyu munsi ni Major General Fred Gisa Rwigema witangiye kubohora Igihugu muri 1990,Umwami Mutara III Rudahigwa,Agatha Uwiringiyimana,Rwagasana Micheal,Niyitegeka Felecite n’abana b’Inyange banze kwitandukanya n’abandi.

Guverineri w’Intara y’Iburasirazuba CG Emmanuel K Gasana yagejeje ikiganiro ku bari bitabiriye umunsi mukuru w’Intwari z’uRwanda kivuga ku ntwari z’uRwanda, ashimira intwari zitanze guhangana n’ibibazo byari byugarije uRwanda icyo gihe.

Umuyobozi w’Akarere ka Gatsibo Gasana Richard yavuze gusinya imihigo yo kurengera umwana no kurwanya ubukene hagiye kujyamo akarusho hashakwa ibisubizo by’ibibazo bahari uyu munsi ‘’Burya imihigo ni imbaraga zacu kandi iyo hasinywe imihigo abantu bumva ko igiye gushyirwa mu bikorwa nkuko byifuzwa’’.

Iyi mihigo yo kurengera umwana no kurwanya ubukene yasinywe n’abanyamabanga Nshingwabikorwa b’imirenge n’urubyiruko rw’abakorerabushake bagize uruhare runini mu kurwanya no gushyira mu bikorwa amabwiriza yo kwirinda icyorezo cya Covid19.

Gasana Richard yavuze ko muri buri Kagari hatoranyijwe abantu 100 bazakurikiranwa n’inzego zitandukanye zirimo iza Leta n’abafatanyabikorwa bayo hakazajya hakorwa isuzuma nyuma y’amezi atanu.

Umunyamabanga Nshingwabikorwa w’Umurenge wa Kabarore Urujeni Consolee yavuze ko n’ubundi bajyaga basinya imihigo ndetse bagakurikirana imibereho myiza y’abaturage ariko ubu aba baturage bagiye kwitabwaho byumwihariko kugirango akurwe mu bukene.