Mu Karere ka Gatsibo hatangijwe ubukangurambaga ku burere n’uburezi bw’umwana w’umukobwa bufite inzanganyamatsiko ‘’ejo hazaza heza hari mu biganza byanjye’’.

Ubu bukangurambaga bugamije kugaragaza imbogamizi umwana w’umukobwa ahura nazo mu buzima bwe bwa buri munsi zishobora kumuvutsa amahirwe yejo hazaza heza.

Ubwo hatangizwaga iki gikorwa cy’ubukangurambaga kuri uyu wa kabiri taliki ya 20 Gashyantare 2018, abanyeshuri b’ikigo cy’amashuri cya Bihinga (GS Bihinga) giherereye mu murenge wa Kabarore batanze ubutumwa bunyuze mu ndirimbo, imivugo n’imbyino byose bigaragaza uburyo umwana w’umukobwa ahura n’imbogamizi ku burere n’uburezi.

Umunyamabanga Mukuru wa Unity club intwararumuri,Madamu Regine Iyamuremye wari umushyitsi mukuru muri ubu bukangurambaga yasabye abana b’abakobwa kumenya no gushyira imbere icyerekezo cy’ubuzima bwabo bwejo hazaza heza.

Iyi gahunda y’ubukangurambaga yateguwe na Minisiteri y’uburinganire n’iterambere ry’umuryango (MIGEPROF) igamije ko hagaragazwa ibibazo abana b’abakobwa bahura nabyo bikabavutsa ejo heza habo, ibi bibazo birimo guterwa inda zidateganyijwe, kunywa ibiyobyabwenge n’amakimbirane akunze kuboneka mu miryango.

Kantengwa Mary, Umuyobozi w’Akarere ka Gatsibo wungirije ushinzwe imibereho myiza y’abaturage yasabye ababyeyi kujya baganiriza abana b’abakobwa ku mindagurikire y’umubiri wabo (Ubuzima bw’imyororokere) kugira ngo baganirizwa n’abandi kandi bababeshya.