Guverineri w’Intara y’Iburasirazuba CG Emmanuel K Gasana yasabye ibyiciro bitandukanye by’abayobozi gushyashyanira umuturage bamuha serivise nziza kandi ku gihe

Ibi yabigarutseho kuri uyu wa Mbere taliki ya 29 Kanama 2022,ubwo yahuraga n’ibyiciro bitandukanye by’abayobozi byo mu Karere ka Gatsibo harimo ab’inzego z’ibanze,abatowe n’abavuga rikumvikana bo mu mirenge ya Nyagihanga,Ngarama,Gatsibo,Rugarama,Kiziguro na Kiramuruzi.

Umuyobozi w’Intara yari kumwe n’abagize inama y’umutekano itaguye ku rwego rw’Intara y’Iburasirazuba,Ubuyobozi bw’Akarere n’inzego z’umutekano zikorera  ku Karere ka Gatsibo.

Aba bayobozi basabye gukorera hamwe kugirango babashe kumenya abo bayobora no kubakemurira ibibazo,ati’’Bayobozi mugomba gukorera hamwe nk’abayobozi ndetse n’inzego zatowe mu byiciro bitandukanye kugirango mushobore gushyashyanira umuturage’’.

Umuyobozi wa Polisi mu Ntara y’Iburasirazuba ACP R.Innocent Kanyamihigo yasabye inzego z’ubuyobozi kuva ku mudugudu kugera ku murenge n’abavuga rikumvikana gukangurira abaturage kwirinda ibyaha bitandukanye birimo ibiyobyabwenge,ubujura, amakimbirane mu miryango n’ibindi bishobora gusubiza inyuma iterambere ry’umuturage.

Abayobozi mu nzego zitandukanye n’abavuga rikumvikana basabwe kuba umusembura w’iterambere n’imibereho myiza y’abaturage,bagakangurira abaturage gutanga ubwisungane mu kwivuza kugirango barusheho kugira ubuzima bwiza,gahunda ya Ejoheza n’izindi gahunda za Leta abaturage bagiramo uruhare kugirango zishyirwe mu bikorwa.