Gusura ku Mulindi w’Intwari nk’ahantu habumbatiye amateka y’urugamba rwo bubohora Igihugu wabaye umwanya mwiza w’ubusabane hagati y’abakozi ubwabo ndetse n’abayobozi.

Mu rugendo rwo gusura ingoro y’amateka y’Urugamba rwo kubohora Igihugu yo ku Mulindi mu Karere Gicumbi, hakinwe umukino w’umupira w’amaguru wahuje abakozi b’Akarere bakorera ku rwego rw’Akarere n’abakorera ku Mirenge.

Abakozi b’Akarere bagera ku 150 basuye bimwe mu bice bibumbatiye amateka y’urugamba rwo kuboroha Igihugu mu Karere ka Gicumbi.

Iki gikorwa cyakozwe kuri uyu wa Gatatu taliki ya 20 Kanama 2025 aho Ubuyobozi n’abakozi b’Akarere bagera ku 150 bahagarariye abandi kuva ku rwego rw’Akarere, Imirenge n’Utugari.

Nyuma yo gusobanurirwa amateka y’urugamba rwo kubohora Igihugu, Umuyobozi w’Akarere ka Gatsibo Gasana Richard yasabye abakozi bagiye mu rugendoshuri yo gusura ibice bibumbatuye amateka y’urugamba rwo kubohora Igihugu ko uru rugamba rwari rufite impamve ndetse ko natwe dukwiriye gukuramo amasomo yadufasha dutunganya akazi dukora umunsi ku wundi dushyira umuturage ku isonga.

Bamwe mu bakozi b’Akarere ka Gatsibo basuye ibice bibumbatiye amateka y’uruganba rwo kubohora Igihugu ku Mulindi mu Karere ka Gicumbi bavuze ko nyuma yo gusobanurirwa amateka, hari amasomo bakuyemo kandi azabafasha kuzuza inshingano bafite zo gukorera umuturage:  Kudacika intege, gukorera ku ntego, gukoresha bicye dufite tukagera kuri byinshi, gukorera ku gihe, kwiyoroshya mu nshingano, Kwihanganira ibibazo duhura nabyo mu kazi ntibitubuze gutanga service, gushyira umuturage ku isonga no gukora igenamigambi ry’ibikorwa wifuza kugeraho.