Urubyiruko rwo mu Karere ka Gatsibo rwakanguriwe kwima amatwi abapfobya Jenoside yakorewe abatutsi mu Rwanda ahubwo rukabasobanurira ukuri kw’amateka ya Jenoside rwifashishije imbuga nkoranyambaga.

Rwabisabwe n’Umunyamabanga Nshingwabikorwa w’Inama y’Igihugu y’urubyiruko ku rwego rw’Igihugu Mwesigwa Robert ubwo yifatanyaga n’Ubuyobozi bw’Akarere ka Gatsibo mu muganda w’urubyiruko usoza igihembwe cya gatatu 2022.

Uyu muganda wabaye kuri uyu wa gatandatu taliki ya 19 Werurwe 2022 mu tugari 69 tugize Akarere ka Gatsibo,ku rwego rw’Akarere wabereye mu Kagari ka Karenge mu murenge wa Kabarore.

Umuganda usoza igihembwe cya gatatu 2022 wibanze mu gukora ibikorwa bitandukanye byo gusukura ku nzibutso za Jenoside yakorewe abatutsi,gusana no kubakira abacitse ku icumu rya Jenoside yakorewe abatutsi n’ibindi mu rwego rwo kwitegura kwibuka ku nshuro ya 28 Jenoside yakorewe abatutsi mu Rwanda.

Mwesigwa Robert,Umunyamabanga Nshingwabikorwa wInama y’Igihugu y’urubyiruko yasabye urubyiruko kwima amatwi abapfobya Jenoside yakorewe abatutsi mu Rwanda ahubwo bakabasubiza bababwira ukuri kw’ibyabaye mu Rwanda.

Ati’’Urubyiruko rumaze kwiyubaka rufite icyerekezo cyiza, turarusaba kuzitabira ibiganiro bizatangwa mu gihe cyo kwibuka Jenoside yakorewe abatutsi mu Rwanda mu rwego rwo kurushaho gusobanukirwa amateka ’’.

Nyiransekanabo Angelique w’imyaka 48 y’amavuko utuye mu kagari ka Karenge mu Murenge wa Kabarore arashimira urubyiruko n’izindi nzego zamufashije gusana inzu ye yari imaze gusenyuka kubera kutagira urufatiro(Foundation) bikaba byamuteraga impungenge ko ishobora kumugwira.

Ati ‘’Ndashimira cyane urubyiruko ko rwaje kunsanira inzu yanjye kuko wabonaga ishaje kubera kutagira urufatiro,ndishimye cyane’’.