Inama y’umutekano yaguye yateranye iyobowe n’Uuyobozi w’Akarere ka Gatsibo Gasana Richard igamije kurebera hamwe uko umutekano wifashe hirya no hino mu mirenge igize Akarere ka Gatsibo.

Iyi nama yari yitabiriwe na Komite Nyobozi y’Akarere ka Gatsibo,Abanyamabanga Nshingwabikorwa b’Imirenge uko ari 14 igize Akarere,ba Prezida b’Inama Njyanama z’Imirenge,inzego z’umutekano zirimo ingabo,polisi,urwego rw’ubugenzacyaha RIB n’abagize urwego rwunganira Akarere mu mutekano DASSO

Umuyobozi wa Polisi mu Karere ka Gatsibo CIP Eugene Musonera yavuze ko umutekano wifashe neza mu karere,asaba ko hakazwa irondo hirya no hino mu midugudu mu rwego rwo gukumira ibyaha.

Gasana Richard, Umuyobozi w’Akarere ka Gatsibo yasabye inzego z’ibanze ziherutse gutorwa ko zishyira umuturage ku isonga kuko umuturage udafite iterambere n’imibereho myiza nta mutekano aba afite.

Kimwe mu bibazo byashakiwe umuti mu nama y’umutekano yaguye yateranye kuri uyu wa gatatu taliki ya 8 Ukuboza 2021 ni ugukemura ibibazo by’abaturage bafite kugirango ntibahozwe mu nzira bagana ubuyobozi.

Umuyobozi w’Akarerere ka Gatsibo yasabye inzego zitandukanye z’ubuyobozi kwita ku miyoborere myiza igamije gushyira umuturage ku isonga hagamijwe kugira abaturage bafite iterambere rirambye.

Ntidendereza Alfred, Perezida w’Inama Njyanama y’Umurenge wa Kabarore yavuze ko abaturage bo muri uyu murenge bafatanya n’ubuyobozi kwicungira umutekano binyuze mu gukora irondo mu midugudu no muri santeri z’ubucuruzi.

Umuyobozi wa brigade ya 307 mu ngabo z’uRwanda Brigadier Gen F Mutembe wari witabiriye inama y’Umutekano yaguye y’Akarere ka Gatsibo yavuze ko irondo ari ishingiro ry’amakuru mu mutekano w’abaturage.