Inama y’Inama Njyanama idasanzwe y’Akarere ka Gatsibo yateranye kuri iki cyumweru taliki ya 6 Werurwe 2022 iyobowe na Sibomana Saidi,Umuyobozi w’Inama Njyanama y’Akarere ka Gatsibo.

Iyi nama yari igamije gusuzuma no kwemeza umushinga w’ingengo y’imari ivuguruye y’Akarere ka Gatsibo y’umwaka w’ingengo y’imari ya 2021/2022,kwemeza ingurane ikwiye ku mitungo itimukanwa yangijwe hubakwa ibikorwaremezo bitandukanye mu karere,kwemeza urutonde rw’abaturage basabwe gusonerwa imisoro n’umushinga wo kongera ubushobozi urwego rw’Akagari kugirango rurusheho gutanga serivise inoze ku baturage.

Muri iyi nama,hatowe ingengo y’imari ivuguruye y’Akarere ka Gatsibo ya 2021/2022 ingana na miriyari 26,446,701,677 z’amafaranga y’uRwanda ivuye kuri 26,528,364,980 bigaragara ko yabaganutseho miriyoni 81,663,303 bihwanye na 0.30%.

Kugirango hakorwe ibikorwaremezo bitandukanye mu karere ka Gatsibo,hari ibikorwa by’abaturage byangizwa kugirango ibyo bikorwaremezo bibone aho bishyirwa birimo amashanyarazi,amazi,amashuri n’imihanda.

Inama Njyanama y’Akarere ka Gatsibo imaze gusuzuma ubusabe bw’abaturage ko bakwishyurwa imitungo yabo yangijwe n’ikorwa ry’ibikorwaremezo mu mirenge itandukanye igize ka Karere, hemejwe ko abaturage 53 bishyurwa ingurane ikwiye ingana na miriyoni 9,407,446 z’amafaranga y’uRwanda.

Mu rwego rwo kongera ubushobozi urwego rw’Akagari,abagize Inama Njyanama y’Akarere ka Gatsibo bemeje umushinga wo kunganira Abanyamabanga Nshingabikorwa b’Utugari kugura moto bazajya bakoresha mu kazi kabo ka buri munsi hagamijwe kurushaho kunoza serivisi baha abaturage.

Sibomana Saidi, Umuyobozi w’Inama Njyanama y’Akarere ka Gatsibo yavuze ko inama Njyanama izakomeza gushyira umuturage ku isonga hanozwa uburyo ahabwamo serivise,ati’’Uyu mushinga wo kunganira abanyamabanga nshingwabikorwa b’utugari kubona moto ugamije gufasha aba bakozi kurushaho kwegera abaturage mu midugudu mu buryo buboroheye kugirango bumve ibibazo bafite ndetse bishakirwe n’ibisubizo’’.

Nyuma yuko hagaragaye abaturage batandukanye bagizweho ingaruka n’icyorezo cya Covid19 ubucuruzi bwabo bugahagarara kubera ko bwahuzaga abantu benshi burimo utubari,imikino y’amahirwe,kwakira ubukwe n’ibindi,abagize inama njyanama y’Akarere bemeje urutonde rw’abaturage 3,587 ko bahanagurwaho ibirarane by’imisoro bibagaragaraho kandi batarakoraga.