Mu karere ka Gatsibo mu kigo cya TTC Kabarore hasojwe amahugurwa y’imboni z’umutekano 166(Indahangarwa) zatoranyijwe mu rubyiruko rw’abakorerabushake rwakuwe mu mirenge 14 igize Akarere ka Gatsibo.

Intore z’Urubyiruko rw’abakorerabushake rwasoje amahugurwa y’iminsi 4 bagera ku 166 barimo 105 b’igitsina gabo n’igitsina gore 61 bose bari mu cyanya cya TTC Kabarore,iki gikorwa cyabaye kuri uyu wa kane taliki ya 7 Ukwakira 2021.

Abitabiriye ayo mahugurwa yatangiye kuva taliki 3 kugeza 7 Ukwakira 2021 bahawe inyigisho zitandukanye zirimo uburere mboneragihugu no gusesengura amakuru y’icyumba ntangamakuru ku tugari no ku murenge hagamijwe gukumira icyaha cyitaraba,kurwanya amakimbirane mu miryango  n’ihohoterwa rishingiye ku gitsina.

Asoza aya mahugurwa, Umuyobozi w’Akarere ka Gatsibo Gasana Richard yasabye urubyiruko rw’abakorerabushake kutarambirwa ishingano bagiyemo kuko bazahura n’abantu babaca intege

Imwe mu mihigo yahizwe n’intore z’indahangarwa zasojwe amahugurwa y’imbone z’umutekano irimo gushishikariza abaturage kwita ku buhinzi n’ubworozi buteye imbere, kurwanya ihohoterwa rishingiye ku gitsina no kurwanya amakimbirane yo mu miryango.

Igikorwa cyo gusoza amahugurwa y’imboni z’umutekano yaberaga mu cyanya cya TTC Kabarore mu murenge wa Kabarore cyari cyitabiriwe n’abanyamabanga Nshingwabikorwa b’imirenge igize Akarere ka Gatsibo uko ari 14 n’inzego z’umutekano zirimo Ingabo, Police na Dasso.