Abadebite bahuriye mu Ihuriro ry’Abanyarwandakazi mu Nteko ishingamategeko (FFRP) basuye Akarere ka Gatsibo baganira n’ibyiciro bitandukanye b’abayobozi mu nzego zegerejwe abaturage zita ku iterambere ryabo.

Uru ruzinduko rw’iminsi ibiri rw’Intumwa za rubanda bahuriye mu ihuriro ry’Abanyarwandakazi mu nteko ishingamategeko (FFRP) bayobowe na Depite Uwamahoro Bertilde arikumwe na Depite Karemera Francis na Depite Dr.Frank Habineza bakoreye mu Karere ka Gatsibo basuye imiryango ibana mu bakimbirane baganira nayo.

Abadepite basuye Akarere ka Gatsibo bagamije kungurana ibitekerezo n’abayobozi mu nzego zegereye abaturage zita ku iterambere ry’Umuryango no gushyikirana n’abaturage mu bikorwa by’isuku n’isukura no gusura imiryango mu midugudu yashyize mu bikorwa imihigo yabamutimawurugo.

Umuyobozi w’Akarere ka Gatsibo wungirije ushinzwe imibereho myiza y’abaturage Madamu Mukamana Marceline yagaragarije abadepite ishusho y’Akarere ku kwita ku muryango aho hakemurwa amakimbirane arangwa mu muryango ndetse bagakangurirwa kubana neza mu mahoro.

Imwe mu myanzuro wavuye mu nama yahuje Ubuyobozi bw’Akarere, intumwa zarubanda n’ibindi byiciro bitandukanye bifite aho bihuriye n’iterambere ry’umuryango: Kurandura inzitizi zikigaragara mu muryango, Abagore n’abakobwa kuba bandebereho aho bari hose, Kongera amarerero hirya no hino mu karere hashyirwa imbaraga ku mikurire y’abana no Kwigisha urubyiruko rugiye gushinga urugo mu rwego rwo gutegura umuryango utekanye.

Mu gusoza uruzinduko bagiriraga mu Karere ka Gatsibo, abadepite bifatanyije n’Ubuyobozi bw’Akarere n’abaturage mu muganda w’isuku wabereye mu murenge wa Remera mu kagari ka Bushobora mu mudugudu wa Abanyangeyo.