Itsinda ry’Abakozi b’Intara y’Iburasirazuba bayobowe n’Umunyamabanga Nshingwabikorwa w’Intara Dr. Jeanne Nyirahabimana basuye Akarere ka Gatsibo mu gikorwa cyo gusuzuma ishyirwa mu bikorwa ry’imihigo y’Akarere mu mwaka w’ingengo y’imari 2025/2026.

Iri suzuma ry’imihigo y’Akarere rirareba amezi atanu y’igihembwe cya mbere (Nyakanga- Ugushyingo 2025).

Umuyobozi w’Akarere ka Gatsibo Gasana Richard yavuze ko muri uyu mwaka w’ingengo y’imari wa 2025/2026, Akarere ka Gatsibo kahize imihigo 126 irimo: 31 yo mu bukungu, 71 yo mu mibereho myiza na 24 yo mu miyoborere myiza.

Dr Jeanne Nyirahabimana, Umunyamabanga Nshingwabikorwa w’Intara y’Iburasirazuba yavuze ko iri suzuma rigamije kureba aho Uturere tugeze twesa imihigo ya 2025/2026 igihembwe cya mbere, kujya inama ku kwihutisha imihigo ikiri inyuma no gufata ingamba.

Akarere ka Gatsibo kahize imihigo igera ku 126 yahizwe mu mwaka w’ingengo y’imari ya 2025/2026 izatwara ingengo y’imari ingana na Miriyari 39,451,638,868 z’amafaranga y’uRwanda.