Ongera amata Project binyuze mu mushinga Ripple effect bafatanya n’Akarere ka Gatsibo mu gukora ibikorwa bitandukanye bifasha aborozi gukora ibikorwa byo guteza imbere ubworozi bwabo hibandwa ku kuzamura umukamo.

Mu bikorwa by’ibanze uyu mushinga wakoze mu Karere ka Gatsibo harimo guhugurwa abaveterineri ku gutera intanga no kubaha ibikoresho bigezweho bibafasha mu kazi kabo ka buri munsi. Abaveterineri kandi bahawe amahugurwa cyo gusuzuma inka zihaka.

Mu bindi bikorwa Umushinga wa Ongera amata wafashije aborozi bibumbiye mu makoperative ni ukubaha amahugurwa n’ibikoresho bipima ubuziranenge bw’amata mu rwego rwo gukemura ikibazo cyo gupfusha amata bya hato na hato.

Bamwe mu borozi bakorana n’Umushinga wa Ongera amata bavuga ko bahawe imbuto y’ubwatsi bwo guhinga mu rwego rwo kwishakamo igisubizo cy’ikibazo cyo kubura ubwatsi mu gihe cy’izuba.

Mu rwego rwo kurushaho gukora ubworozi bugamije ubucuruzi, aborozi bakora ingendoshuri hirya no hino mu gihugu zigamije kubongerera ubumenyi ku bworozi butanga umukamo mwinshi.

Mu bindi bikorwa byagejejwe kuri bamwe  mu borozi b’Akarere ka Gatsibo ni ukubaha intanga zo mu bwoko bwa Jersey mu rwego rwo kuvugurura ubworozi buganisha ku butanga umukamo.

Ongera amata Project yatangiye gukorera mu Karere ka Gatsibo ku mu Ukwakira 2023 ukazamara imyaka itatu ufatanya n’Akarere ku guteza imbere ibikorwa by’ aborozi.