Mu mwaka w’ingengo y’imari wa 2024/2025, mu Karere ka Gatsibo hakozwe ibikorwa by’umuganda rusange bitandukanye byari bifite agaciro ka miriyoni 493,458,338 z’amafaranga y’uRwanda.

Ibi bikorwa byakozwe n’abaturage binytuze mu muganda rusange, byunganiye ingengo y’imari y’Akarere. Bimwe muri ibi bikorwa byakozwe mu muganda rusange birimo: Gukemura bimwe mu bibazo byari bibangamiye imiberho myiza y’abaturage. Kubaka ibiraro biciriritse, gutera amashyamba n’ibiti by’imbuto.

Aya makuru yatanzwe n’Ubuyobozi bw’Akarere kuri uyu wa Gatatu taliki ya 12 Kanama 2025, ubwo itsinda ry’abakozi ba Minisiteri y’Ubutegetsi bw’Igihugu/MINALOC yasuraga Akarere ka Gatsibo bagamije gusuzuma ibikorwa bitandukanye by’umuganda, inteko z’abaturage, imicungire y’abakozi, imikorere y’amakoperative y’abantu bafite ubumuga ndetse n’ibikorwa by’isuku n’isukura.

Mu ishusho rusange yagargajwe n’Ubuyobozi bw’Akarere, hagaragaye ko mu mwaka w’ingengo y’imari ya 2024/2025 hakozwe ibikorwa by’umuganda bifite agaciro gasaga miriyoni 493 z’amafaranga y’uRwanda, ubwitabire bw’abaturage mu muganda bwageze ku bihumbi 138,571/146.107 bingana na 94.8%.

Mu mwaka w’ingengo y’imari ya 2024/2025, hari amezi 3 hatakozwe umuganda rusange arimo: Nyakanga 2024, Ukuboza 2025 na Kamena 2025 nkuko byatangazwaga na Minisiteri y’Ubutegetsi bw’Igihugu/ MINALOC.