Ku mugoroba wo kuri uyu wa Gatatu taliki ya 25 Kamena 2025, mu Kigo cya TTC Kabarore habereye igitaramo Mvarugamba gisoza umwaka w’amashuri mu gihe abanyeshuri bitegura kujya mu biruhuko.

Ikigo cya TTC Kabarore giherereye mu Mudugudu wa Bihinga mu Kagari ka Kabarore mu Murenge wa Kabarore, gifite abanyeshuri 617 barimo abakobwa 348 n’abahungu 269 bose bitegura kuzaba abarezi barerera u Rwanda.

Muri iki gitaramo hakomereje ubukangurambaga bwo kurinda no kurengera umwana muzamara amezi 3 bufite insanganyamatsiko igira iti: ‘’ Umuryango mwiza, ishingiro ryo kurengera umwana’’.

Iki gitaramo cyaranzwe n’imbyino, imivugo ndetse n’ubutumwa butandukanye bushishikariza abanyeshuri kwirinda inda ziterwa abangavu ndetse basabwa kuzirinda ibishuko mu gihe cy’ibiruhuko bagiye gutangira bisoza umwaka w’amashuri wa 2025.

Abanyeshuri 617 bari mu masibo 13 y’intore, hahembwe amasibo 5 yahize ayandi mu kwesa imihigo.

Umuyobozi w'Akarere ka Gatsibo Gasana Richard arikumwe n'Umuyobozi w'Inkeragutabara mu Karere basabye urubyiruko rw'Abanyeshuri ba TTC Kabarore  ko Igihugu kibakunda kandi nabo bagomba kwikunda mu rwego rwo gutegura ejo habo hazaza.