Minisitiri w’Ubuhinzi n’Ubworozi Dr. Mark Cyubahiro Bagabe ari kumwe n’Ubuyobozi bw’Akarere n’izindi nzego, yasuye Koperative COCAHU ifite uruganda rutunganya umusaruro wa Kawa ruherereye mu Murenge wa Kageyo.

Ni igikorwa cyakozwe taliki ya 2 Kamena 2025, ubwo yasuraga Akarere ka Gatsibo agamije gusura ibikorwa bitandukanye by’ubuhinzi n’ubworozi.

Koperative y’abahinzi ba Kawa yo mu Murenge wa Kageyo COCAHU igizwe n’abanyamuryango 208 barimo abagore 62 n’abagabo 146.

Umucungamutungo wa Koperative itunganya umusaruro wa Kawa COCAHU iherereye mu Murenge wa Kageyo NSABIMANA Jean de Dieu avuga ko muri uyu mwaka baguze toni 1,020 akaba ari nazo batunganyije, bakaba baraguze kawa mu baturage ku giciro cya 870 Frw ku kiro.

Koperative COCAHU ifite abakozi 203 barimo abahoraho 11 ndetse na 192 badahoraho. Ubuyobozi bw’iyi koperative buvuga ko bwatanze akazi ku baturage bakabasha kwiteza imbere.

Ubwo yasuraga Koperative COCAHU yo mu Murenge wa Kageyo igura ikanatunganya Kawa, Minisitiri w’Ubuhinzi n’Ubworozi Dr. Mark Cyubahiro Bagabe yashimye imikorere yiyi Koperative, ashima uburyo itunganyamo Kawa. Ati: ‘’ Ndabashimira cyane uburyo mutunganyamo Kawa yanyu kandi ndashaka kubabwira ko Kawa y’uRwanda ari iya mbere ku isi yose’’.