Irondo ry’Umwuga ryabaye igisubizo ku baturage mu rwego rwo kubacungira umutekano n’ibintu byabo hirya no hino mu midugudu igize Akarere ka Gatsibo. Irondo ry’Umwuga ryunganira izindi nzego z’Umutekano mu kubungabunga umutekano w’abaturage n’ibyabo.

Ibi byagarutsweho kuri uyu wa Gatatu taliki ya 16 Mata 2025 ubwo abagize inama y’umutekano itaguye y’Akarere yaganiraga n’abagize irondo ry’umwuga bo mu Mirenge 7 kuri 14 igize Akarere ka Gatsibo hagamijwe kubongerera ubumenyi bwo kunoza inshingano zabo zo gucunga umutekano.

Mu Karere ka Gatsibo habarurwa abagize irondo bagera kuri 469 barimo abagize irondo ry’umwuga rivuguruye 151 n’irondo ry’umwuga risanzwe bagera kuri kuri 318 bose bakorera mu Mirenge 14 igize Akarere ka Gatsibo.

Muri aya mahugurwa, Umuyobozi w’Akarere ka Gatsibo Gasana Richard yasabye abagize irondo rivuguruye ndetse n’iry’umwuga risanzwe ko bagomba kurangwa n’ikinyabupfura, kuba inyangamugayo no gukorera ku gihe mu kazi kabo ka buri kunsi ko gucunga umutekano.

Zimwe mu nshingano z’irondo ry’umwuga ni ukunganira izindi nzego z’umutekano mu kurushaho gucungira abaturage umutekano ndetse n’ibyabo.

Karekezi Alex, utuye mu Kagari ka Teme mu Murenge wa Gasange avuga koi rondo ry’umwuga rifite umumaro kuko bunganira inzego z’umutekano gucunga umutekano abaturage ndetse n’ibyabo, ati: ‘’ Irondo ry’umwuga ririmo ibice 3: Irondo ry’umwuga rivuguruye, irondo ry’umwuga risanzwe ndetse n’irondo ryacu abaturage twikorera kugirango twicungire umutekano ubwacu’’.

Aya mahugurwa y’abagize irondo ry’umwuga yakorewe mu Mirenge 7 ariyo: Kabarore,  Muhura, Kiziguro, Murambi, Kiramuruzi, Rwimbogo  na Gasange. Biteganyijwe ko indi Mirenge nayo izakorwerwamo aya mahugurwa yo kunoza imicungire y’Umutekano y’abagize irondo ry’Umwuga.