Mu Karere ka Gatsibo, Intore 1,849 nizo zasoje urugerero rw’inkomezabigwi icyiciro cya 12 zirimo abakobwa 899 n’abahungu 950. Uru rugerero rwari rufite  insanganyamatsiko igira aiti: ‘’ Duhamye umuco w’ubutore, ku rugerero rwo kwigira’’.

Mu bikorwa byakozwe n’intore zari ku rugerero rw’inkomezabigwi icyiciro cya 12 birimo: Gukora isabune no kwigisha abaturage kuyikora, gupima ubutaka busharira no gukora ifumbire y’imborera ituma ubusharire bw’ubutaka bukira, gutoza abaturage isuku, kubaka imirima y’igikoni, gusana intebe mu bigo by’amashuri no gufatanya n’ubuyobozi kubakira abaturage batishoboye no kugira uruhare mu gusana ibiro by’utugari mu mirenge itandukanye.

Kuri uyu wa Gatanu taliki ya 28 Gashyantare 2025 nibwo hasojwe urugeroro rw’inkomezabigwi icyiciro cya 12, ku rwego rw’Akarere ka Gatsibo rwasorejwe mu Murenge wa Rwimbogo.

Ubwo hasozwaga urugerero rw’inkomezabigwi icyiciro cya 12 ku rwego rw’Akarere, Umuyobozi w’Akarere ka Gatsibo Gasana Richard yashimiye uru rubyiruko ku uruhare bagize mu gushyira umuturage ku isonga babinyujije mu bikorwa bitandukanye bakoze biteza imbere imibereho myiza y’abaturage no kuzamura iterambere ryabo.

Imporanyenabo Severin, ni imwemu  ntore zatorejwe mu Murenge wa Rwimbogo mu Kagari ka Nyamatete yavuze ko yishimira uruhare rwe yagize mu bikorwa bitandukanye biteza imbere Igihugu; ‘’Twakoresheje imbaraga zacu kugirango hagabanywe ingengo y’imari yagendaga ku mirimo itandukanye yo gufasha abaturage’’.

Asaba Frank, ni Umuyobozi w’ishuri ryisumbuye rya ES Gasange ahamya ko ibikorwa indore zakoze ku rugerero bifite icyo bivuze ku igabanuka ry’imikoreshereze y’ingengo y’imari ku bigo by’amashuri. Ati: ‘’ Intore zari ku rugerero rw’inkomezabigwi icyiciro cya 12 zakoze ibikorwa bitandukanye birimo gukora amasabune adufasha kunoza isuku ku ishuri ndetse bubatse imirima y’igikoni myinshi iteweho imboga twajyaga tugura mu isoko kugirango tugaburire abana indyo yuzuye, none ubu izi mboga nizera mu minsi micye iri imbere ingengo y’imari twakoreshaga izagabanuka’’.

Intore zari ku rugerero rw’inkomezabigwi 12, zasoje urugerero rememera abaturage batishoboye inka 14 mu rwego rwo kubafasha kwikura mu bukene no kurushaho kwiteza imbere.