Intore 1,398 nibo bitabiriye urugerero rw’inkomezabigwi ikiciro cya 10 mu Karere ka Gatsibo rwatangiye mu Ugushyingo 2022 kugeza taliki ya 24 Gahyantare 2023.

Kuri uyu wa Gatanu taliki ya 24 Gashyantare 2023, Guverineri w’Intara y’iburasirazuba CG Emmanuel Gasana arikumwe n’intumwa ya MINUBUMWE bifatanyije n’Ubuyobozi bw’Akarere ka Gatsibo mu muhango wo gusoza urugerero rw’Inkomezabigwi ikiciro cya 10 ku nsanganyamatsiko igira iti ‘’ Duhamye umuco w’ubutoreku rugerero rwo kwigira’’.

Akarere ka Gatsibo niko kongeye kuza ku isonga mu ntara y’iburasirazuba mu kwesa imihigo y’ibikorwa by’urugerero rw’inkomezabigwi icyiciro cya 10 n’umwaka ushize mu rugerero rw’ikicirio cya 9 nabwo Akarere ka Gatsibo kaje ku isonga mu turere 7 tugize Intara y’Iburasirazuba.

Umuyobozi w’Akarere ka Gatsibo Gasana Richard, yavuze ko intore zari ku rugerero rw’Inkomezabigwi mu Karere ka Gatsibo zakoze ibikorwa bitandukanye byunganiye ingengo y’Imari y’Akarere mu guteza imbere umuturage.

Muri uyu mwaka, intore zari ku rugerero zari 1,398 zirimo abakobwa 755 n’abahungu 643 zakoze ibikorwa bitandukanye bifite agaciro ka Miriyoni zisaga 322 z’amafaranga y’u Rwanda.

Bimwe mu bikorwa byagezweho n’intore zari ku rugerero mu Karere ka Gatsibo birimo: Hacukuwe amaterasi y’ikora ku buso bwa hegitari 121.6, abana 79 bari barataye ishuri barisubijwemo, hakurikiranwe ibiti by’imbuto 28,049  byatewe muri gahunda ya Gatsibo igwije imbuto, aborozi 68,123 bashyizwe mu byiciro.

Mu bindi bikorwa byakozwe n’intore zo kurugerero rw’inkomezabigwi icyiciro cya 10 birimo kubakira abaturage batishoboye amazu 51, hasanwe amazu 116, hubatswe imirima y’igikoni 320 n’ubwiherero 134.

Umfuyisoni Bernadette, Umutahira w’intore z’Akarere ka Gatsibo yavuze uru rugerero rwakoze ibikorwa by’intangarugero byafashije kuzamura imibereho n’iterambere by’abaturage kandi bikunganira ingengo y’imari y’Akarere mu guteza imbere abaturage.