Kuri uyu wa Gatanu taliki ya 21 Ugushyingo 2025, abagize Inama Njyanama y’Akarere ka Gatsibo bateranye baganira ndetse bemeza imishinga itandukanye igamije guteza imbere abaturage mu mishinga yo gukwirakwiza amashanyarazi n’amazi.

Iyi nama yayobowe na Perezida w’Inama Njyanama y’Akarere Sibomana Saidi arikumwe n’abagize Biro y’Inama Njyanama y’Akarere.

Muri iyi nama, hemejwe umushinga mushya wo gukwirakwiza amashanyarazi mu mirenge 6 y’Akarere ka Gatsibo yari itaragerwamo umuriro w’amashanyarazi. Biteganyijwe ko muri uyu mushinga ingo zigera kuri 12,266 zizabona umuriro w’amashanyarazi. Uyu mushinga uzatanga akazi ku baturage bagera kuri 800 barimo abagabo 500 n’abagore 300.

Abaturage bagiye guhabwa Umuriro w’amashanyarazi nabo mu Mirenge ya Gatsibo, Nyagihanga, Kageyo, Ngarama, Kiramuruzi na Kiziguro bagera ku bihumbi bisaga 12.

Umuyobozi w’Akarere ka Gatsibo Gasana Richard yavuze ko iyi mishinga yombi yo gukwirakwiza umuriro w’amashanyarazi nisoza, abaturage bose b’Akarere ka Gatsibo bazaba bafite umuriro w’amashanyarazi.

Muri iyi nama hemejwe umushinga wo kwagura uruganda rw’amazi rwa Gihengeri mu rwego rwo gukemura ikibazo cy’ibura ry’amazi rya hato na hato mu baturage.

Abagize Inama Njyanama y’Akarere, bagejejweho imihigo y’Akarere y’umwaka w’ingengo y’imari ya 2025/2026. Mu mihigo Akarere ka Gatsibo kahize igera ku 126 harimo iyo mu bukungu 31, imibereho myiza 71 n’imiyoborere myiza igera kuri 24. Iyi mihigo yose izashyirwa mu bikorwa itwaye ingengo y’imari isaga miriyari 39 z’amafaranga y’uRwanda.