Mu rwego rwo kwihutisha ibikorwa bigamije kuzana iterambere n’imibereho myiza by’abaturage b’Akarere ka Gatsibo abagize Inama Njyanama y’Akarere,abafatanyabikorwa,abanyamabanga Nshingwabikorwa b’Imirenge n’abayobozi b’amashami ku rwego rw’Akarere bakoze umwiherero w’iminsi 3 wabereye muri ‘’EPIC Hotel’’ iherereye mu Karere ka Nyagatare.

Uyu mwiherero w’iminsi itatu wari ufite insanganyamatsiko igira iti ’’Ubumwe bwacu nizo mbaraga zacu, Duharanire gushyashyanira umuturage’’ wabaye kuva taliki ya 5-7 Kanama 2022 witabirwa n’abayobozi batandukanye hamwe n’abafatanyabikorwa bagera kuri 64

Intego y’uyu mwiherero yari ukongerera ubumenye inzego no guhanahana amakuru hagamijwe kunoza imikorere n’imikoranire no gutanga serivise nziza kandi zinogeye umuturage, kwemeranya ku mushinga w’imihigo y’Akarere ya 2022/2023 no gufata imbangamba zo kuyesa, gusuzuma no kwemeza ubudasa n’udushya by’Akarere no kugaragarizwa amahirwe aboneka mu mikoranire n’ubufatanye n’izindi nzego zikorera mu Karere.

Muri uyu mwiherero,abayobozi batandukanye barimo Guverineri w’Intara y’Iburasirazuba,Umuyobozi w’Ikigo cy’Igihugu cy’Ubuhinzi n’Ubworozi mu Rwand,uhagarariye Ikigo cy’igihugu gishinzwe amakoperative n’uhagarariye ikigo cy’ubutaka bagaragarije inzego zitandukanye amahirwe ahari kugirango umuturage akomeze gutera imbere.

Intumwa za Minisiteri y’Ubutegetsi bw’Igihugu,RALGA n’urwego rw’Igihugu rw’Imiyoborere /RGB batanze ikiganiro ku bitabiriye umwiherero kivuga ku ‘’Kunoza imikorere n’imikoranire y’Inama Njyanama n’izindi nzego zikorera mu Karere’’.

Umunyamabanga wa Leta muri Minisiteri y’ubutabera akaba n’imboni ya Guverinoma mu Karere ka Gatsibo Amb.Nyirahabimana Solina yasabye inzego zitandukanye zikorera mu Karere ka Gatsibo kurushaho gukorera hamwe kugirango umuturage atere imbere akemurirwa ibibazo afite.

Ladislas Ngendahimana, Umunyamabanga Mukuru w’ishyirahamwe ry’uturere n’umujyi wa Kigali/RALGA yagaragarije abari mu mwiherero inzego ziyobora Akarere zirimo Inama Njyanama y’Akarere,Komite Nyobozi y’Akarere,Ubunyamabanga Nshingwabikorwa na Komite y’umutekano.

Muri uyu mwiherero w’iminsi 3 wafatiwemo imyanzuro 14 izashyirwa mu bikorwa n’Ubuyobozi bw’Akarere,abagize inama Njyanama,abafatanyabikorwa na bamwe mu bakozi b’Akarere.