Ikiyaga cya Muhazi ni hamwe mu hantu nyaburanga Akarere ka Gatsibo gafite, iyo uhageze wumva uruhutse mu mubiri ndetse ukaba wanahindura imitekerereze igana aheza ukaba wafata ingamba ku kintu runaka, ni ahantu abantu batandukanye barimo abafite ibirori by’abantu benshi, bacye, abantu ku giti cyabo biyakirira.

Ikiyaga cya Muhazi gikora mu Mirenge ya Kiramuruzi, Murambi na Gasange y’Akarere ka Gatsibo. Hari abaturage bahafite ibikorwa bitandukanye by’iterambere birimo: Amahoteri, ubworozi n’ubuhinzi.

Bamwe mu baturage baturanye n’ikiyaga cya Muhazi bo mu Mirenge ya Kiramuruzi, Murambi na Gasange bavuga ko ikiyaga cya Muhazi ari ahantu nyaburanga hashobora kureshya bamukerarugendo bagasura ibikorwa Bihari ndetse bagasiga n’amafaranga mu baturage b’Akarere ka Gatsibo.

Akarere ka Gatsibo gafite ahantu nyaburanga harimo: Ikiyaga cya Muhazi, utubindi twa rubona, ibigabiro by’umwami biherereye mu murenge wa Gatsibo ndetse n’Urutare rwa Ngarama.