Ibigo by’amashuri yisumbuye bya TTC Kabarore na GS Bihinga biherereye mu Murenge wa Kabarore byaraguwe mu rwego rwo gukemura ikibazo cy’ubucukike no kurushaho kuzamura ireme ry’uburezi.

Ku kigo cya GS Bihinga hubatswe inyubako zitandukanye zirimo: Ibyumba by’amashuri 4, ibiro by’umuyobozi w’ikigo, icyumba cy’ikoranabuhanga( smart classroom), labatatwari, icyumba amanyeshuri bafatiramo ifunguro n’igikoni, ibyumba by’amashuri 3 by’incuke, ubwiherero 4 n’uruzitiro. Kuri iri shuri kandi havuguruwe ibyumba by’amashuri 23 n’icyumba cy’umukobwa. 

Ibikorwa byo kwagura ikigo cya GS Bihinga byuzuye bitwaye ingengo y’imari ingana na Miriyari 1,895,562,544 z’amafaranga y’uRwanda ku nkunga ya bank y’isi.

Ku kigo cya TTC Kabarore hubatswe inyubako zitandukanye zirimo: Inyubako irimo ibiro by’Ubuyobozi w’ikigo n’icyumba cy’abarimu; inyubako igizwe n’icyumba cy’ikoranabuhanga(Smart classroom), icyumba cy’isomero, icyumba cy’abanyeshuri bafatiramo ifunbguro kigezweho, ubwiherero bufite imiryango 24, amacumbi y’abakobwa agezweho ndetse hubatswe ikigega gifata amazi, byose byatwaye amafaranga y’uRwanda agera kuri Miriyari 1,928,228,558 yatanzwe na banki y’isi inyuze muri Minisiteri y’Uburezi.

Manishimwe Gilbert, Umuyobozi wa TTC Kabarore yavuze ko kwagura iki kigo byakemuye ubucucike bw’abanyeshuri mu ishuri, abanyeshuri babonye icumbi ryagutse ndetse Ubuyobozi bw’ikigo bubona aho bukorera hagutse hatandukanye naho bwakoreraga mbere.

Kwagura ibigo by’amashuri bya TTC Kabarore na GS Bihinga biherereye mu Murenge wa Kabarore byuzuye bitwaye Miriyari 3,823,791,102 z’amafaranga y’uRwanda zatanzwe na banki y’isi. Kwagura ibi bigo by’amashuri byatangiye kubakwa kuva muri Gashyantare2023 kugeza mutarama 2025.