Buri mwaka, taliki ya 1 Gashyantare mu Rwanda hizihizwa Umunsi w’Intwari z’Igihugu, muri uyu mwaka wa 2026 nabwo wizihirijwe ku rwego rw’Umudugudu ku nsanganyamatsiko igira iti: “Ubutwari n’Ubumwe bw’Abanyarwanda, inkingi z’iterambere”.

Ni muri urwo rwego, kuri iki cyumweru taliki ya 1 Gashyantare 2026, hirya no hino mu Midugudu igize Akarere ka Gatsibo hizihijwe umunsi w’Intwari z’Igihugu, ku rwego rw’Akarere wizihirijwe mu Mudugudu wa Gasabo mu Kagari ka Butiruka mu Murenge wa Remera.

Ubwo hizihizwaga umunsi w’Intwari z’Igihugu ku nshuro ya 32, Abagize Komite Nyobozi y’Akarere ka Gatsibo bari kumwe n’Inzego z’Umutekano bifatanyije n’abaturage hirya no hino mu Midugudu bishimira ibyagezweho bishingiye ku bufatanye.

Abitabiriye umunsi w’Intwari z’Igihugu mu Karere ka Gatsibo bahawe ikiganiro gifite insanganyamatsiko igira iti: ‘’ “Ubutwari n’Ubumwe bw’Abanyarwanda, inkingi z’iterambere” cyatanzwe na Hategekimana Achille Samson, Umuyobozi w’ishami rishinzwe imiyoborere mu Karere ka Gatsibo.

Umuyobozi w’Akarere ka Gatsibo Gasana Richard yashimiye intwari zitanze zikabohora abanyarwanda ndetse bamwe muri bo bakahaburira ubuzima kugirango Igihugu kiboneke kandi abanyarwanda tugire ubumwe. Yakanguriye abaturage b’Umurenge wa Remera gukomeza kubumbatira ubumwe biteza imbere binyuze mu bikorwa by’Iterambere bakora.

Ubwo kwizihiza umunsi w’Intwari z’Igihugu ku rwego rw’Akarere mu Murenge wa Remera waranzwe n’imbyino, imivugo, ikiganiro cy’ubutwari n’Ubutumwa bukuru bwatanzwe n’Umuyobozi w’Akarere Gasana Richard.

Kuri uyu munsi wo kwizihiza umunsi w’Intwari z’Igihugu, hirya no hino mu Mirenge igize Akarere ka Gatsibo habaye igikorwa cyo kuremera abaturage batishoboye harimo: Inka, amabati n’ibindi bikoresho byo murugo birimo n’ibiribwa.