Kuri uyu wa Kane taliki ya 26 Kamena 2025, Mu Murenge wa Kiramuruzi habereye igikorwa cyo Kwibuka ku nshuro ya 31 Abatutsi bishwe bakajugunywa mu Kiyaga cya Muhazi ndetse n’urubyiruko rwishwe muri Jenoside yakorewe Abatutsi.

Ni igikorwa cyabanjirijwe no gushyira indabo mu Kiyaga cya Muhazi mu rwego rwo kunamira inzirakarengane z’abatutsi bishwe bakajugunywa mu Kiyaga cya Muhazi, ndetse nabahungaga interahamwe bakanyuzwa muri muhazi bakagwamo.

Ni igikorwa cyitabiriwe n’inzego zitandukanye z’Ubuyobozi zieimo: Ubuyobozi bw’Akarere, inzego z’Umutekano n’abaturage biganjemo urubyiruko.

Mubuhamya bwe, Mukankumburwa Caritas umwe mu barokotse Jenoside yakorewe Abatutsi mu cyahoze ari Komine Murambi yagarutse ku mateka y’itotezwa ry’Abatutsi, itegurwa n’ishyirwa mu bikorwa rya Jenoside yakorewe Abatutsi n’uburyo inkotanyi zabarokoye.

Abitabiriye iki gikorwa cyo kwibuka ku nshuro ya 31 Jenoside yakorewe Abatutsi by’umwihariko hibukwa Abatutsi bishwe bakajugunywa mu Kiyaga cya Muhazi, bahawe ikiganiro cy’amateka mabi yaranze u Rwanda akaba yaragejeje ku itegurwa n’ishyirwa mu bikorwa rya Jenoside yakorewe Abatutsi.

Sibomana Jean Nepo, Perezida w’Umuryango Ibuka mu Karere ka Gatsibo yashimiye Inkotanyi zarokoya Abatutsi bicwaga n’Ubuyobozi bwariho icyo gihe, asaba urubyiruko kwirinda ingengabitekerezo ya Jenoside ndetse abakangurira gukoresha neza imbuga nkoranyambaga.

Umuyobozi w’Akarere wungirije ushinzwe iterambere ry’Ubukungu Sekanyange Jean Leonard yakanguriye urubyiruko kunga ubumwe no kwirinda uwariwe wese wabakururira amacakubiri  ahubwo bagakoresha imbaraga bafite mu kubaka Igihugu no gusobanura neza amateka y’Igihugu ku bayagoreka.