Mu Nteko z’abaturage zo kuri uyu wa Kabiri taliki ya 6 Gicurasi 2025, mu Karere ka Gatsibo mu Mirenge yose igize Akarere hatangijwe ubukangurambaga bwo kwishyura ubwisungane mu kwivuza bw’umwaka w’ingengo y’imari ya 2025/2026 hifashishijwe sisiteme Imibereho yasimbuye ibyiciro by’Ubudehe.

Ku rwego rw’Akarere ka Gatsibo, ubukangurambaga bwo kwishyura ubwisungane mu kwivuza bw’umwaka w’ingengo y’imari wa 2025/2026 bwatangirijwe mu Murenge wa Gasange mu tugari twa Kimana.

Mu butumwa bwahawe abaturage kuri uyu wa Kabiri, burimo: Umutekano ugamije gukurikirana imikorere y’irondo, ibikorwa bijyanye n’iminsi 100 yo kwibuka ku nshuro ya 31 Jenoside yakorewe Abatutsi, kubungabunga ibikorwaremezo byegerejwe abaturage birimo amazi, amashanyarazi n’imihanda n’uburyo bushya bwo kwishyura ubwisungane mu kwivuza.

Ubutumwa bwa Minisiteri y’Ubutegetsi bw’Igihugu yagejeje ku baturage kuri uyu wa Kabiri bwagarutse ku buryo bushya bwo kwishyura Mituweli ko bwahujwe na sisitemu imibereho yasimbuye ibyiciro by’Ubudehe.

Umuyobozi w’Akarere ka Gatsibo Gasana Richard, yasabye abaturage kwiyandikisha muri sisitemu imibereho kugirango bashobore kwishyura ubwisungane mu kwivuza, asaba abayobozi b’inzego z’ibanze kurushaho gukangurira abaturage kwiyandikisha muri iyi sisitemu.