Kuri uyu wa Mbere taliki ya 12 Mutarama 2026, mu bigo by'amashuri byo mu Karere ka Gatsibo hatangijwe ubukangurambaga bw'isuku n'isukura bwiswe #FresheriKuIshuri bwateguwe kubufatanye na Minisiteri y’Uburezi (MINEDUC) bugamije guteza imbere umuco w'isuku n'isukura ihoraho mu mashuri.

Ku rwego rw'Akarere, Umuyobozi w'Akarere wungirije ushinzwe iterambere ry'Ubukungu arikumwe n'izindi nzego yatangirije ku mugaragaro ubukangurambaga bw'isuku n'isukura mu mashuri mu kigo cya ES APEM Ngarama giherereye mu Murenge wa Ngarama.

Ubu bukangurambaga bwatangirijwe mu bigo by’amashuri 4 birimo: ES APEM Ngarama giherereye mu Mujyi rwagati mu Murenge wa Ngarama, GS Kiziguro giherereye mu Murenge wa Kiziguro mu Kagari k’Agakomeye, GS Gatoki giherereye mu Kagari ka Bukomane mu Murenge wa Gitoki na GS Muhura cyo mu Murenge wa Muhura. 

Biteganyijwe ko ubu bukangurambaga bw’isuku n’isukura mu bigo by’amashuri buzasozwa taliki ya 31 Werurwe 2026. 

Mu Karere ka Gatsibo hari ibigo by'amashuri 202 birimo aya Leta 88, afatanya na Leta kubw'amasezerano 61 n'ayigenga 53.

Umuyobozi w’Akarere wungirije ushinzwe iterambere ry’Ubukungu Sekanyange Jean Leonard yavuze ko ubu bukangurambaga bw’isuku n’isukura mu bigo by’amashuri bugamije gukangurira abanyeshuri kugira isuku ihereye ku mubiri, imyambaro, mu mashuri aho bigira ndetse n’iwabo murugo.