Mu Karere ka Gatsibo mu mirenge 14 ikagize hatangijwe igihembwe cy’ihinga cya 2024 A , ku rwego rw’Akarere cyatangirijwe kuri site ya Rucumbo iherereye mu Kagari ka Nyabicwamba mu Murenge wa Gatsibo.

Iki gikorwa cyatangijwe n’Umuyobozi w’Akarere ka Gatsibo Gasana Richard arikumwe n’inzego zitandukanye zirimo Ikigo cy’Igihugu gishinzwe ubuhinzi n’Ubworozi (RAB), Minisiteri ishinzwe ibikorwa by’ubutabazi, umushinga wa Hinga wunguke n’inzego z’umutekano zikorera ku rwego rw’Akarere

Igishanga cya rucumbo gifite ubuso bwa hegitari 23 zizaterwaho ibigori bigasimburanwa na soya mu gihembwe cya B. Iki gishanga gihingwamo n’impunzi z’abanyekongo zicumbikiwe mu nkambi ya Nyabiheke n’abaturage bazakiriye (Host Community).

Atangiza igihembwe cy’ihinga cya 2024 A, Umuyobozi w’Akarere Gasana Richard yasabye abahinzi gutegura imirima no gutera imbuto ku gihe kugirango bazabone umusaruro mwiza kandi mwinshi no kwiyandikisha muri smart nkunganire ibafasha kubona ifumbire.

Ati’’ Ndasaba abahinzi ko bitabira gahunda yo guhingira ku gihe no gutera imbuto ndetse bakitabira gahunda yo kuhira mu gihe cy’izuba na gahunda yo gushaka ibikoresho byo kuhira kuko Leta ibyunganira’’.

Mu gihembwe cy’ihinga cya A 2024, mu Karere ka Gatsibo hateganyijwe guhingwa ibihingwa byatoranyijwe birimo: Ibigori, ibishyimbo,soya, imyumbati n’umuceri.