Mu Karere ka Gatsibo hatangijwe gahunda yo gukora igihano cy’imirimo y’inyungu rusange giteganywa n’iteka rya Perezida nomero 022/01 ryo ku wa 31/3/2023 ku baturage bakoze ibyaha bito bagakatirwa igihano cy’imirimo y’inyungu rusange.

Abaturage batangiye gukora igihano cy’imirimo y’inyungu rusange bazajya bakora ibikorwa bitandukanye byateguwe n’Ubuyobozi bw’inzego z’ibanze mu minsi 3 mu cyumweru, amasaha atatu ku munsi.

Atangiza ibi bikorwa, Umuyobozi w’Akarere wungirije ushinzwe iterambere ry’ubukungu Sekanyange Jean Leonard yasabye abaturage batangiye gukora igihano cy’imirimo y’inyungu rusange ko bagomba kwitwararika bakajya bitabira ibi bikorwa kugirango bazasoze neza ibihano byabo kugirango bahanagurweho ibyaha.

Mu Karere ka Gatsibo baharurwa abaturage 142 bagomba gukora igihano cy’imirimo y’inyungu rusange, amakuru aturuka mu Mirenge 14 igize Akarere igaragaza ko abaturage 92 aribo bagaragara muri iyi mirenge. Ibi bikorwa byizakorwa mu gihe cy’amezi 6 kugeza ku mwaka umwe.