Ubuyobozi bw’Akarere ka Gatsibo kubufatanye  n’ihuriro Nyarwanda ry’ubworozi bw’inka zitanga umukamo (RNDP)  bakoze ubukangurambaga bugamije iterambere ry’ubworozi mu Karere no gushing ihuriro ry’amakoperative y’aborozi.

Muri iyi nama hagaragajwe ko mu Karere ka Gatsibo habarurwa inka ibihumbi 71,483 zirimo inyarwanda zigera ku bihumbi 20,988, iza Kijyambere ni 2,118 ndetse n’izivanze zigera ku bihumbi 48,318.

Ku bijyanye n’Umukamo w’Amata, mu Karere ka Gatsibo haboneka umukamo w’amata ungana na litiro ibihumbi 60,535 ku munsi. Agera ku makusanyirizo 6 manini ari mu Karere  ziri hagati ya litiro ibihumbi 10,000 kugeza 15,000.

Muri iyi nama, bagarutse ku kamaro k’ihuriro ry’amakoperative y’aborozi akorera mu Karere harimo ubujyanama, gutanga amakuru ku gihe no gukemura zimwe mu mbogamizi amakoperative ahura na zo zitarinze kugera ku buyobozi bwite bwa Leta.

Kayitare Godfrey wororera mu Karere ka Nyagatare akaba n’Umuyobozi w’Ihuriro ry’amakoperative mu Karere ka Nyagatare yasangije ubunararibonye n’umumaro w’ihuriro ry’amakoperative y’aborozi ndetse avuga ko ihuriro rifasha kugeza amakuru akenewe ku borozi ku gihe.

Mu buhamya bwa Kadogo Aimable wo mu Karere ka Rubavu yasabye aborozi b’Akarere ka Gatsibo gukora kinyamwuga bagamije ubucuruzi buteye imbere, ati: ‘’ Ngewe nororera kuri hegitari 2 zonyine ariko maze kuba intangarugero mu Karere ka Rubavu ndetse ubu ndi Umuyobozi w’Ihuriro ry’amakoperative y’aborozi mu Karere ka Rubavu. Mu myaka micye ishize nakoreraga Leta ariko ubu nahisemo kuyikorera nyuze mu bikorwa byanjye bwite by’ubworozi’’.

Gasana Richard, Umuyobozi w’Akarere ka Gatsibo yasabye amakoperative y’aborozi kuzahitamo abayobozi bazabahagararira mu ihuriro ry’amakoperative y’aborozi rizajyaho mu minsi micye iri imbere, asaba aborozi kuzatora ubuyobozi bw’ihuriro buzabagirira umumaro kandi bubateza imbere.