Kuri uyu wa Kane taliki ya 28 Kanama 2025, mu Karere ka Gatsibo hakozwe inama rusange y’Inama y’Igihugu y’abagore baturutse hirya no hino mu Mirenge igize Akarere ka Gatsibo bahagarariye abandi.

Iyi nama yabereye mu Murenge wa Kabarore ifite insanganyamatsiko igira iti: ‘’ Uruhare rw’Umugore mu kwimakaza ihame ry’uburinganire mu muryango’’.

Bamwe mu bagore bamurikiye Ubuyobozi bw’Akarere bimwe mu bikorwa bagezeho binyuze mu bukangurambaga bwakozwe n’Ubuyobozi butandukanye burimo n’abagize Inama y’Igihugu y’abagore ku nzego zibegereye.

Abitabiriye iyi nama kandi, bahawe ikiganiro ku itegeko ry’umuryango mu rwego rwo kubafasha gusobanukirwa amategeko kugirango barusheho kwirinda no gukemura amakimbirane yo mu muryango.

Bishyika Oliver, Umuhuzabikorwa w’Inama y’Igihugu y’abagore yashimiye Ubuyobozi bw’Akarere ubufatanye badahwema kubagaragariza mu rwego rwo kurushaho guteza imbere umuryango binyuze mu guteza imbere umugore.

Umuyobozi w’Akarere wungirije ushinzwe iterambere ry’ubukungu Sekanyange Jean Leonard yasabye abagize Inama y’Igihugu y’abagore ku nzego zitandukanye kuba imbarutso y’iterambere binyuze ku gukumira amakimbirane yo mu Muryango.