Mu gihe harimo gutegurwa gahunda y’Intore mu biruhuko, mu Karere ka Gatsibo hakozwe amahugurwa y’abatoza b’Intore mu biruhuko bagera 79 mu rwego rwo kumenya imirongo migari y’iyi gahunda.

Mu Karere ka Gatsibo kubufatanye n’abafatanyabikorwa batandukanye, hateguwe gahunda y’intore mu biruhuko izaba kuva taliki ya 23 Nyakanga kugeza 2 Kanama 2025 ku nsanganyamatsiko igira iti: ‘’Ubuzima bwiza, agaciro Kanjye’’.

Mu myaka 10 ishinzwe, muri buri biruhuko hagiye gashyirwaho gahunda yo kwita ku rubyiruko igamije gukomeza kubungabunga ubuzima bw’urubyiruko mu gihe cy’ibiruhuko, kubarinda ubuzererezi no gukomeza kubatoza umuco wo gukunda Igihugu.

Gahunda y’Intore mu biruhuko izitabirwa n’ibyiciro 3 bigendeye ku myaka y’ubukure birimo: Kuva ku myaka 10-13, 14-16 n’imyaka 17-30. Gahunda y’Intore mu biruhuko izabera ku masite 65 yitabirwe n’abana bagera ku 52,450.

Umuyobozi w’Akarere wungirije ushinzwe imibereho myiza y’abaturage yavuze ko iyi gahunda y’intore mu biruhuko izafasha urubyiruko guhabwa amahugurwa ku indagagaciro z’umuco nyarwanda, kwirinda ababashuka no kurinda no kurengera umwana.