Mu Kagari ka Nyabicwamba mu Murenge wa Gatsibo yagiye kubakwa uruganda ruto rw’ibigori ruzafasha impunzi zo mu nkambi ya Nyabiheke n’abaturage bazakiriye no gutunganya hegitari 14 z’ubutaka mu gishanga cya Nyabicwamba.

Ibi bikorwa byagarutsweho kuri uyu wa Kabiri ubwo ubuyobozi bw’Akarere bwakiraga itsinda ry’abayobozi ba UNHCR n’abafatanyabikorwa bayo bafatanya mu bikorwa bitandukanye bigamije guteza imbere impunzi n’abaturage bazakiriye.

Umuyobozi w’Akarere ka Gatsibo Gasana Richard yashimiye uruhare rw’abafatanyabikorwa mu iterambere ry’imibereho myiza y’abaturage, ashimira UNHCR hamwe n’abafatanyabikorwa bayo ku bikorwa bigeye gukorerwa impunzi zicumbikiwe mu nkambi ya Nyabiheke iherereye mu Murenge wa Gatsibo ndetse n’abaturage b’Abanyarwanda bazakiriye.

Ati: ‘’ Mu myaka ibiri ishize, hatunganyijwe hegitari 13 mu gishanga cya Nyabicwamba zihigwaho n’impunzi ndetse n’abanyarwanda, bose bahuriye muri koperative kandi basangira inyungu zo gukorera hamwe, nubu tugiye kubona ibindi bikorwa birimo uruganda ruto rw’ibigori ndetse no kongera gutunganya igice cy’igishanga kitari gitunganyijwe’’.

Ibi bikorwa bigeye gukorwa, bizatwara miriyoni 450 z’amafaranga y’uRwanda zirimo 240 Frw zizakoreshwa mu gikorwa cyo gutunganya hegitari 14 mu gishanga cya Nyabicwamba na 210 Frw zizubaka uruganda ruto ruzatunganya umusaruro w’ibigori.