Guverineri w’Intara y’Iburasirazuba Pudence Rubingisa yasuye Akarere ka Gatsibo aganira n’abagize Biro y’Inama Njyanama y’Akarere na Komite Nyobozi baganira ku iterambere ry’Akarere, imbogamizi zikigaragara ndetse n’uburyo bwo gufata ingamba no kwihutisha iterambere ry’imibereho myiza y’abaturage.

Muri iyi nama, Ubuyobozi bw’Akarere bwagaragaje ishusho rusange y’ibikorwa by’iterambere bimaze kugezwa ku baturage birimo ibikorwaremezo by’imihanda, amazi n’amashanyarazi, ubuhinzi, ubworozi n’uburezi.

Guverineri Rubingisa yashimiye intambwe imaze guterwa mu rwego rw’iterambere ry’Akarere harimo ibikorwaremezo birimo kubakwa bigamije gufasha abaturage kwiteza imbere, asaba ko hakomeza gukora ibikorwa by’iterambere ry’imibereho myiza bishingiye ku byifuzo by’abaturage. Ati: ‘’ Ndabashimira ubufatanye bwanyu mu miyoborere y’Akarere, iyo buri rwego rukora inshingano zarwo neza kandi rugakorana n’urundi, abaturage babona serivise inoze kandi iterambere ririhuta’’.

Perezida w’Inama Njyanama y’Akarere ka Gatsibo Sibomana Saidi, yashimiye ubufasha bw’Intara itanga mu guhuza ibikorwa by’inzego z’ibanze no gukemura ibibazo bigaragara mu ishyirwa mu bikorwa ry’imishinga itandukanye igamije guteza imbere abaturage.

Mu mwaka w’ingengo y’imari wa 2024/2025, Akarere ka Gatsibo kahize imihigo 118 arimo 20 yo mu bukungu, 70 mu mibereho myiza na 28 mu miyoborere myiza n’ubutabera.