Umuryango wa ‘’Learn Work Develop’’   ufatanyije n’Ubuyobozi bw’Akarere ka Gatsibo bwasoje umushinga w’abafashamyumvire ba Masenge mbahafi bagera ku 129 bo mu Mirenge ya Rugarama na Gitoki.

Gahunda ya Masenge Mbahafi igamije kurwanya inda ziterwa abangavu n’ibindi bibazo urubyiruko ruhura nabyo bigakoma mu nkokora iterambere ryarwo birimo inda ziterwa abangavu, kwishora mu biyobyabwenge n’izindi ngeso mbi zidakwiriye umunyarwanda.

Muri iyi gahunda kandi, hari hagamijwe gufasha abana bafite ubumuga no kubatinyura bagakomeza kwiyubakamo icyizere cy’ubuzima bw’ejo hazaza, imiryango ibana mu makimbirane ndetse no gufasha urubyiruko n’abakuze bishora mu ngeso z’ubusambanyi bagakangurirwa kuva mu ngeso mbi.

Mu bindi bikorwa byakozwe n’Umushinga Learn Work Develop binyuze muri gahunda ya Masenge Mbahafi, hafashijwe urubyiruko rugera ku 1,500 ku gusobanukirwa ihamwe ry’uburinganire, ubuzima bw’imyororokere ndetse hanasubijwe mu ishuri urubyiruko rugera kuri 45 babyaye imburagihe rwigishwa imyuga itandukanye.

Mukagasana Naomie, Umukozi w’Akarere ka Gatsibo ushinzwe iterambere ry’uburinganire mu Karere ka Gatsibo avuga ko gahunda ya Masenge mbahafi yabaye igisubizo kandi itanga umusaruro munini ku rubyiruko rwari rufite ibibazo bitandukanye rwatinyaga kubwira imiryango yabo; ati: ‘’ Masenge mbahafi yabaye umuhuza w’abana n’ababyeyi batumvikanaga kubera imyitwarire y’impande zombi, ndetse hakagaragazwa ahari ikibazo mu muryango kugirango gikurikiranwe n’ubuyobozi’’.

Gahunda ya Masenge Mbahafi imaze imyaka 3 ikorera mu Karere ka Gatsibo mu Mirenge ya Rugarama na Gitoki igamije kurwanya inda ziterwa abangavu n’ibindi bibazo urubyiruko ruhura nabyo bigakoma mu nkokora iterambere ryarwo.