Abayobozi n’abakozi b’Akarere ka Gatsibo biyemeje gukoresha amikoro bacye ahari ariko hagakorwa byinshi bishyira umuturage ku isonga.

Ni ubutumwa bwatanzwe na bamwe mu bakozi b’Akarere ashingiye ku rugendoshuri rwakozwe rwo gusura ibice bibumbatiye amateka y’urugamba rwo kubohora Igihugu; ku Mulindi rwa Byumba mu Karere ka Gicumbi.

Bivugwa ko aha ariho Perezida wa Repubulika y’uRwanda Paul Kagame wari uyoboye urugamba rwo kubohora Igihugu no guhagarika Jenoside yakorewe Abatutsi yari afite ibirindiro bikuru bya RPA.

Ally Hassan NGAMIJE, Umuyobozi w’Ishami ry’ubutegetsi n’imicungire y’abakozi mu Karere ka Gatsibo ati: Tumaze gukora uru rugendoshuri; hari byinshi twahakuye bizadufasha kunoza inshingano zacu za buri munsi harimo gukoresha ubushobozi bucye dufite ariko tugakora byinshi biteza imbere umuturage wacu’’.

Amwe mu masomo yakuwe muri uru rugendoshuri arimo: Kudacika integer mu byo dukora, gukorera ku ntego, gukoresha bicye dufite tukagera kuri byinshi, gukorera ku gihe, kwiyoroshya mu nshingano, Kwihanganira ibibazo duhura nabyo mu kazi ntibitubuze gutanga service, gushyira umuturage ku isonga no gukora igenamigambi ry’ibikorwa wifuza kugeraho.