Abaturage bo mu Murenge wa Kabarore mu tugari twa Nyabikiri, Simbwa na Karenge basabwe kwirinda ibikorwa bibashora mu byaha ahubwo bakishakamo imbaraga zo gukora ibikorwa bibateza imbere.

Ni ubutumwa bahawe kuri uyu wa Kabiri taliki ya 29 Nyakanga 2025, ubwo hakorwaga umuganda udasanzwe wari ugamije gusibura umuferege uhuza ikigo cya Gisirikare cya Gabiro n’abaturage baturanye n’iki kigo.

Rutaro Hurbert, Umuyobozi w’Urwego rw’Ubugenzacyaha RIB ku rwego rw’Intara y’Iburasirazuba yakanguriye abaturage kwirinda ibyaha kuko rimwe na rimwe babiterwa no kunywa inzoga z’inkorano zitemewe, kwirinda ubujura ndetse no kwirinda kuvogera ikigo cya Gisirikare cya Gabiro; 

Ati: ‘’ Baturage b’Akarere ka Gatsibo ndabasaba kwirinda ibikorwa bibashora mu byaha, hari abaturage munywa inzoga z’inkorano zitemewe zikabagiraho ingaruka mbi ku buzima bwanyu. Muhaguruke mukore ibikorwa biteza imbere imiryango yanyu ndetse n’Igihugu muri rusange’’.

Gasana Richard, Umuyobozi w’Akarere ka Gatsibo yasabye abaturage baturanye n’Ikigo cya Gisirikare cya Gabiro kwirinda kuvogera icyo kigo kuko bibangamira ibikorwa by’umutekano bihakorerwa.