Abaturage bagera kuri 50 bo mu Kagari ka Nyamatete mu Murenge wa Rwimbogo bahawe ubumenyi bwo guhinga imboga mu nzu za Kijyambere (Green house) no gutegura neza imirima y’igikoni.

Aba baturage bibumbiye mu itsinda Urumuli bahuguwe n’Umufatanyabikorwa w’Akarere Imbaraga ku nkunga ya Plan International Rwanda ku guhinga imboga mu nzu za Kijyambere.

Abaturage bibumbiye mu itsinda urumuli bahamya ko kuva batangiye gukorana n’Umufatanyabikorwa Imbaraga imibereho yabo yatangiye guhinduka igana aheza, kuko babanje guhindura imitekerereze biyemeza gukorera hamwe.

Umurebwayire Rachel, Umukozi w’Umuryango w’abahinzi n’aborozi mu Rwanda imbaraga avuga ko uyu mushinga ufasha abaturage kwigira hagamijwe guhindura imibereho y’abaturage iganisha ku kongera iterambere ry’abaturage.

Ati: ‘’ Inzu ya Kijyambere yubakiwe abaturage 50 bibumbiye mu itsinda Urumuli ifite ubuso bwa metero 8 kuri 32 ihinzemo igihingwa cya Pavuro z’icyatsi ku ngemwe 760 ikaba ifite uburyo bwo kuhira hakoreshejwe ikoranabuhanga’’.

Mu bindi bikorwa uyu mushinga umaze gufasha abaturage batishoboye bo mu Karere birimo koroza abaturage amatungo magufi(ingurube) 49 mu Mirenge ya Murambi, Rwimbogo na Kiziguro mu rwego rwo kuyiteza imbere no kuyifasha kwivana mu bukene.

Mu Kagari ka Murambi mu Murenge wa Murambi hari itsinda ry’abandi baturage 50 bahinze imigina y’ibihumyo 3,383 aho umugina umwe ugurishwa amafaranga y’uRwanda 1000. Ubuhinzi bw’ibihumyo bwerera igihe gito kandi bushobora no gutanga amafaranga ndetse no gukemura ikibazo cy’imirire mibi ikunze kuboneka mu miryango imwe n’imwe.