Kuri uyu nwa Kane taliki ya 29 Mutarama 2026, ku biro by’Akarere habereye igikorwa cyo gushyikiriza amakoperative 5 y’ubuhinzi n’ubworozi moto 5 zo mu bwoko bwa Rifani zizabafasha kugeza umusaruro ku isoko.

Izi moto zatanzwe kubufatanye n’Ikigo cy’Igihugu gishinzwe imihanda/ RTDA mu rwego rwo gufasha amakoperative 5 y’ubuhinzi n’ubworozi akorera mu mihanda yubatswe ya Kaburimbo (Feeder roads)

Amakoperative yahawe izi moto ni: Ubumwe Gatsibo ihinga umuceri mu gishanga cya Rwangingo gikora mu Mirenge ya Ngarama na Gatsibo, Koperative MUDACOS ni ukusanyirizo ry’amata riherereye mu Murenge wa Kiramuruzi, COOPROMASA ikora ubuhinzi bw’ibishyimbo, Soya n'Ibigori mu Murenge wa Gatsibo, KARIDECO ikora ubuhinzi bw'Umuceri mu Murenge wa Kabarore na TWITEZIMBERE MURAMBI icuruza Inyongeramusaruro n’Imbuto ku bahinzi mu Murenge wa Murambi.

Mukamwezi Jacqueline, Umukozi w’ikigo cy’Igihugu gishinzwe imihanda/RTDA yavuze ko usibye inshingano bafite zo gukora imihanda mu gihugu, bahisemo no gufasha amakoperative 5 y’ubuhinzi n’ubworozi ikora ku mihanda/ Feeder roads kugirango bazajye bageza umusaruro wabo ku isoko.

Umuyobozi w’Akarere wungirije ushinzwe iterambere ry’ubukungu yavuze ko izi moto zizafasha aya makoperative kugeza unusaruro wabo ku isoko mu buryo bworoshye kandi mu gihe gito. Izi moto 5 zahawe abaturage zifite agaciro ka miriyoni 26,965,000 z’amafaranga y’uRwanda harimo ubwishingizi bw’umwaka umwe n’ibyangombwa byazo.